Co-operation Minister Pu Lalrinmawia Ralte chuan vawiin khan MAHFED (Mizoram State Agriculture, Horticulture, Forestry & Marketing Co-operative Federation Ltd.) in Annual General Assembly vawi 20-na, Archive Hall Babutlanga neih chu a hmanpui a. He hunah hian Pu Sangdingliana, lAS, Registrar Cooperative Societies, Co-operation Department chu khualzahawm a ni bawk.
Minister chuan MAHFED Ltd. thiltum zing ami "marketing"-ah hmasawn theihna tur leh hmalakna tur kawng tam tak a inchhawpchhoh mek thu a sawi a. Rel kawng leh lawng lian hmanga thenawm ram te nen kan ramin insumdawntawnna leh inpawhna tha zawk siam a tumna ah Mizoram chu a luhka pawimawh ber anih avangin hemi kawng hawi hian kan sutthlek a tul a ni a ti a. Minister Pu Lalrinmawia Ralte chuan hemi chungchangah hian ngaihtuahna thui tak hman a tul thu sawiin, thil tha a lo luh rual hian a kaihhnawih thil thalo tam tak a luh ve theih avangin thil tha chu do mai lovin, rilru fim tak nena lo dawngsawng a, a thalo chu do tura kan insiam a pawimawh a ni, a ti a. MAHFED hmasawnna atan an thil rel te bawhzui turin a remchang ang zela hmalakpui a inpeih thu a sawi bawk.
Khualzahawm Pu Sangdingliana, IAS pawhin thu sawiin, cooperative society-in a tum angin kuthnathawktute tan thil lei leh hralhna awlsam zawk siam tura hmalak zel chu pawimawh a tih thu leh, member ten kan zavaia hlawk tlanna tur a ni tih pai reng turin vawiina kalkhawmte chu assembly hlawk thlak tak hmang turin a sawm a ni.
Vawiin MAHFED inkhawmpuiah hian State chhunga MAHFED-a inziaklut society hrang hrang 94 atangin Palaite an kal khawm a. MAHFED Ltd. Chairman Pu C. Lalchhunga chuan Assembly hawnna inkhawm hi kaihruaiin, Pu Zohmingthanga, Managing Director hnen atangin kumin chhunga MAHFED hmalakna hrang hrang leh hmachhawp awmte ngaihthlak a ni a. Pu Vanlalruata, Vice-Chairman chuan lawmthu sawiin hun hi a khar in, chawhnu lamah rorel inkhawm a chhunzawm a ni.
Assembly Report atanga a lan dan in MAHFED sumdawnna pui ber Leitha (Fertilizer) - Company atanga lak luh a Sorkar-in rate a siam anga kuthnathawkte hnenah hralh leh atang hian MAHFED hian kumin chhungin cheng nuai 19 chuang hlep a nei thei a ni.
