Vawiin chawhma dar 11:00 AM khan DC’s Conference Hall-ah, “ Get Ready for Plain packaging/ Vaihlo tuam dan leh nghawng a neihte” tih thupuia hmangin, Observance of World No Tobacco day-2016 hman a ni.

He World No Tobacco Day-2016, Observance programme hi Pi Marilyn Rualzakhumthangi, SDO(S) in a kaihruai a, Pu N.Chakhai, Addl.DC chu khuallian a ni. Khuallian chuan thusawiin Vaihlo zuk leh hmuamin kan hriselna leh chhungkaw inenkawlna sum leh paia nghawng a neih dan chu kan hriat vek tawh hnu a ni a. Vawiina zirlai naupangte hnena ka hril duh che u chu : Saiha District atanga IAS Officer 2 kan neih a, meizu lo mi ve ve an ni a. ka lehkha zir ve hunlai atangin ka chik a, Zuk leh hmuam tih lo mi hi a tihho aiin lehkha zirnaah an hlawhtling zawk zel a ni, chuvangin lehkha thiam thei nih an duh chuan zuk leh hmuamah in fihlim a ngai a, a lo ti tawhte tan pawh a bansan hma apiang mi vannei in ni mai dawn a ni, a ti. Vawiin hun hmannaah hian Dr.Lalnunziri, MO chuan Vaihlo zuk leh hmuamin mihring taksa a khawichhiat dan Power Point Presentation hmangin a entir a. Pu ZT.Vawra Hmar, Consultant,NTCP in “Plain packaging” chungchang zirtirna power point presentation hmangin a nei bawk. Pu ZT Vawra chuan Plain Packaging kan tih hian Meizial bawm chu mawlmang takin a plain tawp dawn tihna a ni lo va, Mei la zu lo te tana mei zuk an chak loh nana a it-awm lo thei ang ber tura meizial bawm cheibawlna tur zawk a ni, a ti. India ram state tam takah chuan 1st April 2016 atang khan Meizial bawm te hi mit la loh rawng, bawm intiah vek leh 85% hi Health warning ( 25% a thuin, 60% a lem hmangin) a tuam tur a ni , tih dan hi chak takin an kalpui tawh a. Hei hian mei la zu ngai lo thalai ten meizuk chakna leh itna nasa taka an neih tlem phah beisei a ni, a ti bawk.

Vawiin Observance of World No Tobacco day-2016 hmannaah hian Saiha District chhunga Tobacco Free School 3 heng: Grace Academy, Adventist English School leh Southern English Academy te hnenah Chawimawina thuziak Citation hlan an ni bawk.

Vawiin programme hi Head of Office te, NGO hrang hrang hruaitute, Chanchinbu mi te leh sawmbik School naupang leh zirtirtu te nena hman a ni.