Vawiin khan Coordination Committee on Traffic Management chu an Chairman, Home Minister Pu R. Lalzirliana office chamber-ah an thukhawm. Meeting-ah hian Vice Chairman, Parliamentary Secretary Lt. Col. (Rtd.) Z. S. Zuala, Chief Secretary Pi L. Tochhong leh member dangte an tel a. Aizawl khawpui chhunga lirthei tlandan leh a kaihhnawih harsatna sutkian dan tur engemaw zat rel a ni.

Aizawl khawpui chhung kawng a lo thawl zawk theih nan a hmalak tawhte thlir letin, nikum a Coordination Committee-in a thurel tawhte chu a mawhphurtu department theuhvah hmalak chhunzawm zel tura rel a ni a. Bungraw phur motor lian tan khawpui chhunga tlan lova an hel theih dan tur te, vantlang kawnga zana motor riah phalloh chungchangte sawiho a ni a. September thla atanga zawm turin Chanmari atanga Treasury Square kawng dung sirah tumahin motor dah phalloh tur a rel a ni bawk.

Meeting-ah hian Traffic rules hrechiang manglo a motor khalh chhuakte avanga harsatna thleng fo thin chungchang sawi hovin, mipuite him zawk nan driving licence pek chhuah lamah khirh leh zawka kalpui dan tur rel a ni a. FCI kudam a truck buhfai phur tlan dan mumal zawka ruahmanna siam chungchangte, hmun thenkhata speed bump dah chungchangte rel a nih bakah, garage neilo tan a motor registration pek loh te, Sorkar office building reng renga lirthei parking siam thin tura thu awm sa tawhte chu inhrilhhriat thar leh a ngaih thu sawi a ni bawk.