Directorate of Food, Civil Supplies & Consumer Affairs chuan Rail kawng zauh hunchhunga mipuite mangang loturina ngen a, hemi chungchangah hian a hnuaia ami ang hian mipuite hnenah thuchhuah a siam.
Sawrkar Laipui Ministry of Railways chuan North East-a Rail kawng thenkhat, heng Lumding – Badarpur te, Badarpur - Jiribam te, Badarpur - Bairabi te leh Badarpur - Churaibari/Dharmanagar/Kumaraghat te hi Broad Gauge network a thlak turin a siam tha dawn a, hei hian South Assam, Manipur, Tripura leh Mizoram te a nghawng dawn a ni. He hna hi October 2014 atanga March 2016 thleng thawh tur niin an siam hunchhung zawng hian Rail a kal thei dawn lova, hei hi ‘Mega Block’ ti a sawi a ni.
He ‘Mega Block’ hunchhung hian a bik takin Mizoram, Tripura leh Manipur State te hian kan buhfai mamawh za zelah 70 (Mizoram State bikah thlatin 10000 qtls. vel) hi Rel (Train) hmanga phurh thlen a nih avangin buhfai thiarvelnaah a tuar tur State kan ni.
Mizoram Sorkar hian he hna kalpui tur hi a hriat veleh hma chak taka la nghalin, FCI hotute leh Sawrkar laipui hotute hemi chungchang hi alo sawipui tawh a. Chief Secretary leh FCS&CA Department hotute pawhin hemi chungchang hi sawi hovin Mizoram chhunga buhfai lo lut tur khaihlak lo tura rawtna chi hrang hrang te an losiamtawh bawk. Nimin khan FCS&CA Minister Pu John Rotluangliana pawhin Northeast Region-a FCI hotupa (Regional Manager, Shillong) a Office Chamber-ah kawmin he ‘Mega Block’ hun chhunga Buhfai-a harsatna Mizoram in a tawh lohna tura ruahmanna fel fai tak siam turin a hriattir a, FCI lampawhin ruahmanna an siam tur thu leh By-Road a buhfai phurh a harsat dawn leh dawn loh enchhin nan June 2014 hian By-Road in Buhfai hi an phurh chhin tir dawn a ni.
Chuvangin, hetianga ruahmanna fel fai tak kalpui anih avangin ‘Mega Block’ hun chhung hian harsatna a awmlo tura ngaih a ni a, mipuite lo mangang lo turin FCS&CA Department chuan a ngen a ni.
