Vawiin khan Power & Electricity Department bultuma kawlpetha renchenmna kawnga hmalakna chikhat Light Emitting Diode (LED) atanga siam bulb leh tubelight te hman uar inzirtirna leh heng bungruate a thlawnna semna programme LED Village Campaign chu Pu Lal Thanzara, Minister of State chuan hmanpuiin he campaign hi a hawng nghal a ni. He programme hi Mizoram Legislative Assembly, Deputy Speaker leh bialtu MLA ni bawk Pu R. Lalrinawma pawhin a hmanpui a ni. LED Village Campaign hnuaiah hian LED atanga siam bulb leh tubelight tha leh tlo, power heh lo chu Muthi a chhungkaw tin hnenah pek a nih bakah street light te pawh LED street light a thlak vek a ni.
Pu Lal Thanzara chuan Muthi khawpum ina power heh lo bulb leh tubelight athlawnna an dawng chu an vannei hle a ni tiin Mizoram pumah hetiang hmang khaw pathum zinga pakhat an ni ta chu a lawmpui thu a sawi bawk. He malsawmna hian sum leh pai an hum theih bakah an power mamawh pawh nasa takin a tlem phah theih thu a sawi bawk.
Khawvel thang zelah kawlpetha mamawhna leh hmanna a sang chhoh zel a, kawlpetha lamah Mizoram a intodelh theih nan Sawrkar chuan kawng tinrengin chak takin hma a la chho meka, amaherawh chu tun dinhmunah Mizoram in kawlpetha a dehchhuah a tlem a, kan power mamawh tam zawk chu phai atanga chawkluh anih avangin kawlpetha neih chhun ang angte sem rual a ngai thin a ni a, a ti. MW 60 pechhuak thei Turial Hydel Project nakuma hawn beisei anih tur thu sawiin he project hian nasa takin kawlpetha lamah intodelhna asiamngei a beisei tih a sawi bawk.
Pu Lal Thanzara hian Sawrkar hi mipuisiama ni a, mipui tawiawmna tel lovin a kal thei lova, kawng dik leh tha a zawh theih nan tawngtaina nen venpui a tul a ni a ti. Mipui tan kawngpui tha ber ber te, kawlpetha tam zawkte leh thingtlang lamah zirtirtu indaih tawka dah chu a duh reng a, heng atan hian a theih angin hma a la a, mahse sum leh pai lamah kan intodelh loh avangin harsatna sawrkar chuan a tawk thin a, heng harsatna te hi hrechiang lova pawl thenkhat ten Sawrkar an vau thin hi chu a Mizo lovin a Kristian lo a ni, a ti.
He hunah hian Pu R. Lalrinawma pawhin thusawiin Mizoram chu kawlpetha lamah kan intodelh loh avangin a renchen dan inzirtir hi uar a tul a ni, a ti a. LED light hian electric chhit man nasa takin a ti tlem thei a hemi avang hian chhungkaw tin ten sum leh pai an hum thei a ni a ti bawk. LED light chhit that zia Mizoram puma tlangautu pawimawh tak an ni dawn a, Muthi pum hian hemi kawngah hian mawhphurna lian tak an ko ah a innghat a ni tih hriat a pawimawh hle a ni a ti bawk.
He programme hi Pu Lianchungnunga, Secretary, P & E leh PHE Department chuan kaihruaiin Pu Lalduhzuala Sailo, Chief Electrical Inspector chuan Technical Report sawiin hun a hmang bawk a ni. Muthi VCP Pu Chhungdailova chuanLEDVillageatan Muthi an thlang chu Sawrkar, Department leh bialtu MLA chhunga lawmthu a sawi.
LED Village Campaign in a tum ber chu thingtlang khua tih en (electrified village) tawh a consumer te eng chhit chu energy heh lo leh eng tha chi LEDs (Light Emitting Diode) a thlak a ni. He ruahmanna hnuaiah hian street light hman mek pawhLED streetlight a thlak tur a ni bawk.
He scheme hiIndiaram state hrang hrang ah 11th Plan chhungin thawh a ni a, Mizoramah pawh Serchhip district-a Buang leh Neihloh khua ah te 2010 khan LED Village Campaign hi kapuiin he ruahmanna hi hman a ni tawh a ni.
He scheme hi kum 2012 -13 a Ministry of Power, Government of India hnuai a peng pakhat Bureau of Energy Efficiency (BEE) atanga cheng nuai 20 hmuh atanga thawh a ni. BEE hi energy conservation activities hrang hrang Energy Conservation Act 2001 in a sawi te lek kawh (enforce) tur a Central sorkar in a siam a ni a, State tinah a hnathawh te bawh zui a nih theih nan office/department hman tur a neih a ngai a, chu chu State Designated Agency tih a ni a. Mizoram sorkar chuan State Designated Agency atan chuan Electrical Inspectorate a ruat a ni.
Hemi hnuaia Muthi khua a thawh turte chu:-
1) 570 Nos. 100 Watt Incandescent Bulb hman mekte 8 Watt LED Bulb a thlak.
2) 250 Nos. 40 Watt Fluorescent Tube hman mekte 20 Watt LED Tube a thlak bakah
3) 15 Nos. 250 HPSV Street Light hman mekte45 Watt LED StreetLight a thlakte an ni.
Chhut dan tlangpuiah chuan consumer te hian electric eng hi nitin darkar 5 hmang thin ang leh street light te hi darkar 11 chhung hmang thin anga ngaih a ni a, hetiang hi a lo nih chuan tun dinhmunah Muthi khua hian electric 1,37,331 Unit kumtin hmang ral tura chhut niin electric bill atana senso ngai Rs. 4,68,549/- ni tura chhut a ni.
A chunga ruahman anga electric’ light te thlak’ a nih hnuah chuan Muthi khuaah hian electric kum khatah 20,157 Unit hmang ral tur leh a man pawh Rs. 69,282/- chauh pek ngai tawh tura ngaih a ni.
Tichuan, kum khata energy (electric) save (hum) tur zat chu 1,17,174 Unit niin a sum zawng chuan Rs. 3,99,267/- vel a ni.
LED light (electric eng tha, heh lo leh tlo chi) hmang uar tura inzirtirna hi Energy Conservation activities chikhat a ni a. Hei hian India ram power indaihlohna pawh ti zia awm/ti nep thei turin mithiamte chuan an ngai a ni.
