Kumin January ni 17-a Education Minister Pu Lalsawta hova zirna kaihhnawih Department te leh pawl hrang hrang aiawh thukhawmin a lo rel leh a rawt anga zirna inah ruihtheih thil leh damdawi hmansual khap leh venna tur atana Committee din ‘Core Committee on Prevention on Drug Abuse in Educational Institutions’ chu vawiin khan a hmasaber atan Pu K.Lal Nghinglova, IAS, Commissioner & Secretary, School Education Department kaihhruaina hnuaiah a office chamber-ah an thukhawm.

Pu K. Lal Nghinglova chuan thuhmahruai sawiin pawl hrang hrang aiawhte chu rawtna tha hmalak zui theih nghal ang chi sawi turin a sawm nghal a. Meeting-ah hian he Committee-a member, pawl hrang hrang aiawh te chuan zirna inah ruihtheihthil leh damdawi hmasual khap leh venna atan rawtna tha tura an ngaih te chu zau takin an sawiho a.

Meeting chuan ruihtheih thil leh damdawi hmansual a hlauhawm zia zirlai te hnenah zirtir leh hrilhriat chu tun aia uar leh zual a pawimawh, tiin hemi chungchanga thuziahna pamphlet chu buatsaih a, zirna inah te a zau thei ang bera semdarh tha an ti a. Hemi chungchanga SCERT-in pamphlet a lo siam chu tha tiin chumi chu chhut chhuah tura hmalak nise an ti bawk. SCERT aiawhte chuan tleirawlte enkawlna leh a bikah an tana zirtirna duan ‘Adolescent Education Programme’ chu sikul tam takin an hlamchhiah a, hei hi thar thawh leh a tul thusawiin ‘Adolescent Education Programme’ hnuaia training hrang hrang kumin atan an ruahman chu an chhawpchhuak bawk. Heng training programme te hi meeting chuan tha tiin ‘Adolescent Education Programme’ chu nasa leh zawka kalpui a nih thei nan hmalak nise an ti.

Meeting chuan zirna inah chauh hmalak chu a tawk lo tiin Kohhran hrang hrang te chuan Sande Sikul zirlai ah te hemi chunchangah zirtirna an telh chuan ruihtheih thil leh damdawi hmansual dona kawngah chak zawka hma kan sawn theih an rin thu an sawi. Tawng dang film lehlin in thalai nunah nghawng thalo a neih dante pawh meeting ah hian tarlan an i.

Meeting-ah hian Core Committee-a member - School Education leh Higher & Technical Education Department aiawh te; SCERT, CYMA, Synod, Mizo Moral Reformation Forum, MCTA, HISSLAM, MISSTA, MSTA, MESMSOT, MZP leh MSU aiawhte pawh an tel a ni.