Vawiin khan Mizoram Chief Secretary Pu Lalnunmawia Chuaungo hova State Level Co-ordination Committee on Zoonotic Diseases thukhawmin Coronavirus hrileng chung chang a sawrkar inpuahchahnate an thlirho a; Committee thuchhuak chuan Coronavirus hri leng laka Mizoram a him theih nan Mizoram sawrkarin tha thlah lovin hma a la zel a ni a ti a, helama mawhphurtu officer-te hnen atangin report ngaihthlak a ni bawk.

Tunah hian Mizoram mi leh sa China atanga lo kir mi pangate chu an chenna in lamah a theih ang anga an chhungte nen inchiahpiah lovin fimkhur takin an awm mek a; hetia ruahmanna siam a nih hian Coronavirus hrik an pai tihna ni lovin, sawrkar laipui leh state sawrkar fimkhurna avanga hma lakna mai a ni. An hriselna dinhmun endik thin niin vawiin thlengin insawiselna nei pakhatmah an awmlo a ni.

Laboratory a test tura thisen sample mi pathum hnen atanga lak tawh ah pahnih chu NICED Laboratory, Kolkata-ah thawn tawh a ni a; test result pawh hriat tawh niin Coronavirus kai lo (negative) a nih thu dawn a ni.

Health & Family Welfare Minister kaihhruaina hnuaiah State Level Task Force din a nih hnu ah District Level Task Force pawh din chhoh mek a ni a; district tin hian mahni district huam chhungah a tul angin hma an la chho zel dawn a ni.

Lengpui Airport leh Zokhawtharah khualzinte hriselna endik hna pawh a pangngaia kalpui mek zel a ni a, Coronavirus hrilengin ram sawmhnih pariat lai kangkai tawhin mi singhnih sangriat chuangah a hrik hmuhchhuah tawh a ni. Thihpui mi zanga chuang an awm laiin mi sangkhat zanga deuh thaw chu an dam chhuak leh tawh bawk a ni.

India rama Kerala state-ah mi pathumah coronavirus hrik hi hmu tawh mahsela ram chhunga state dang zawng chu kan la him a ni.