Mizoram Director General of Police (DGP) Pu SBK Singh, IPS chuan nimin khan Lawngtlai a tlawh.

DGP hi a nupui bakah, Deputy Inspector General of Police (Southern Range) Pu Rajneesh Gupta, IPS leh Senior Staff Officer to DGP Pu Zonun Sanga, MPS te'n an tawiawm a. Lawngtlai Bawrhsap Pi Shashanka Ala, IAS, Superintendent of Police Pu Amit Goel, IPS leh official dangte'n Circuit House-ah an lo dawngsawng a ni.

DGP hian Lawngtlai District Executive Force (DEF) hmunpui tlawhin, an dinhmun a en fiah a. Lawngtlai SP Conference Hall siam thar chu hawngin, Lawngtlai DEF hnuaia thawktute nen inkawm hona hun an hmang a. Thawktute'n an harsatna hrang hrang a hnena an lo thlente ngaihthlaksakin, chin felsak a lo tiam a ni.

DGP chuan Mizoram Police-a sanction post 12,000 awmah 9,000 chiah hnawh khah a nih thu sawiin, thawktu indaih lohna nasa tak su kiang turin Chief Minister hma lakpuina hnuaiah kumin chhunga thawktu 700 lak belh tum a nih thu a sawi a. Quarters leh lirtheia harsatna awm mek chin fel nan Ministry of Home Affairs-ah Rs vaibelchhe 367 vel dil niin, hmuh theih ngei beisei a nih thu a sawi a. Mizoram Police-ah a tha zawng leh hma sawn zawnga thil inthlakthlengtir tuma tan an lak mek thu sawiin, police te chu ram tana an theihna zawng zawng nena hna thawk turin an hriselna uluk a, insawi zawi uar a, zu leh ruihhlo dang laka inthiar fihlim turin a chah.

DGP te hi Lawngtlai DEF leh police nupuite'n anmahni lawmna thilpek an lo hlan a. Hun hman zawhin, Lawngtlai chhuahsanin Lunglei an pan leh nghal a ni.