Nimin (30.09.2019) khan Chief Minister's Cabinet Meeting room-ah Council of Ministers chuan thu pawimawh tak tak relin an thukhawm. He meeting-ah hian sawrkar department hrang hrang 13 atanga thu pawimawh lutte chu ngaihtuah niin, chung zinga pawimawh zual te chu hengte hi an ni:

Upate Ni thilpek atan kum upate pension, rualbanlo leh hmeithai te chhawmdawlna National Social Assistance Programme (NSAP) pension scheme kalpui meka State sawrkarin a tum (contribution) zat chu a let a tih pun remtih a ni.

Medical Doctor te chu an Superannuation pension hun atan kum 62 bithliah tura rawtna chu remtih a ni.

Sawrkar hnathawk zinga Annual Statement of Immovable Property Returns a hun taka thehlut lo te chu an hlawh hrensak tura Vigilance department atanga rawtna lut chu pawm a ni a. Hei hi kumin chhung statement - 'as on December 31st, 2019' a kalpui a ni ang.

Ex-Servicement te Mizoram sawrkar a rawih nawn an nih theihna tur Mizoram Ex-Servicemen (Re-employment in civil posts) Rules, 2019 chu vawiin meeting hian a pawm a. Hemi bakah hian DP&AR atanga lut dang - Draft Mizoram Municipal Common Cadre Service Rules 2019 leh Mizoram Municipal Subordinate Service Rules 2019 te, draft Mizoram Subordinate Service Selection Board (Recruitment and Condition of Service) Rules, 2019 leh draft Mizoram Public Service Commission (Condition of Service) Regulations, 2019 te chu pawm a ni bawk.

Mizorama thing leh mau atanga thilsiam chhuahna awlsam zawka din a nih theih nan The Mizoram Wood Based Industries (Establishment & Regulation) (Amendment) Rules, 2019 chu pawm a ni a. Fisheries Department atanga Mizoram Fisheries Conservation Rewards Scheme, 2019 leh Mizoram Fisheries Rules, 2019 siam tura rawtna lut te chu pawm a ni bawk. Hemi bakah hian Finance Department atanga lut, Mizoram Protection of Interests of Depositors (in Financial Establishment) Bill, 2019 chu pawm a ni bawk.

Higher & Technical Education Department atanga lut Mizoram Colleges (Provincialisation) (Amendment) Rules 2019 chu vawiin meeting hian pawm bawkin, RUSA hnuaia lecturer 72 lak te chu a remti bawk.