Nimin (30.9.2019) chawhnu khan India sawrkar a Central leh State sawrkar inrelbawl dan leh an inlaichin dan zirchiang tura Diplomatic Outreach programme hmanga rawn zin Republic of the Union of Myanmar Sipai hotute chuan Mizoram University tlawh in mithiamte nen 'Democracy and Federalism' thupui hmanga inkawm hona hun an hmang.

Myanmar Military Delegates aiawhin Lt. General Aung Lin Dwe chuan Mizoram University a 'Democracy and Federalism' chungchanga inkawm hona an buatsaih chu hlawkthlak a tih thu a sawi a, Democracy kalpuina ram hrang hrangte pawh an zirchian thin thu sawiin Federalism hnuaia Governor leh Chief minister hnathawh dan leh inlaichinna hriat chian chu an lo kal chhan pakhat anih thu a sawi bawk.

Programme hi Prof. Lalrintluanga, Dean, School of Social Sciences, Mizoram University in a kaihruaia, Prof. KRS Sambasiva Rao, Vice Chancellor in kal khawmte lawmna thu sawiin Prof. JK Patniak, Prof. Srinibas Pathi, Prof J Doungel leh Dr K Robin ten thupui sawi hawnna hun te hmangin Democracy and Federalism, Mizo Peace Process leh Bengal Eastern Frontier Regulation & Chin Hills Regulation 1896 chungchang sawi zauna hun te hman a ni a, Federalism chu Republic of the Union of Myanmar tih hmasawnna atana hmanraw tangkai tak anih theih dan te sawi ho a ni bawk.

Myanmar military delegates te hi National Museum and Library (NMML), New Delhi a hotuten an rawn tawiawm a, Myanmar Sipai hotu sawm (10) rawn kal in Lt. General Aung Lin Dwe, Office of the Judge Advocate General, Maj. General Soe Naing Oo, Maj. General Than Hlut Thein, Colonel Khin Maung Kyi, Colonel Kyaw Soe Oo, Colonel Kyaw Lin Maung, Lt. Colonel Than Soe, Lt. Colonel Khin Zaw leh Captain Thet Zin Aung te an ni.