Vawiin chawhma dar 11:00 hian I & PR Hall CHANEM ah Lok Sabha inthlanpuia vote tlate chhiartu tura ruat Counting Supervisor, Counting  Assistant leh Addl. Counting Staff mi 45 ten training an nei a, Election Officer Pu R. Lalremsanga MCS in training a kaihruai a. Nl. Margaret Lalrinawmi Fanai ADC nen thil tul leh pawimawh an hrilhfiah a, Pu Pachhunga ASO II in vote of thanks a sawi bawk.

He training ah hian Form 170 (part II) Candidate te vote hmuh zat ziahna tur leh Form 17C, vote tla record-na tur semin hrilhfiah nghal zel a ni a. MP Candidate 4 te hming chu a indawtin 1) Lalawmpuia Chhangte, 2) C.L. Ruala, 3) Dr. H. Lallungmuana leh 4) Rualpawla an ni a. Electronic Voting Machine ah hian candidate te vote hmuh zat hi party leh candidate hmingin a lang dawn lova, a serial number in a rawn lang tawh dawn a, hei hi lo ziahluh zel mai tur a ni tih in hrilhfiah a ni. Congress leh MNF ten vote chhiarna hmuna duty tur Agent an ruat fel tawh a, candidate dang ten an la ruat ve lo tih tarlan a ni bawk a, hriatfiah duh nei tan naktuk (friday) leh vote chhiar hmain zawhfiah theih reng an ni tih an sawi tel bawk.

Lok Sabha Member tur thlanna a vote tlate hi India rampumah a rualin chhiar a ni dawn a, Champhai-ah pawh vote chhiarna hmun tur Keifangtlang DC Complex-a Counting Hall ah May 16 zing dar 7:00 ah vote chhiartu turte kim vek tur a ni a. Zing dar 8:00 ah vote hi chhiar tan tur a ni ang.

Champhai District-a vote tla chhiar hmasak dan tur indawt chu :

21    Lengteng (ST) A/C
22    Tuichang (ST) A/C
23    Champhai North (ST) A/C
24    Champhai South (ST) A/C
25    East Tuipui (ST) A/C