Pu Lalsawta, Law Minister chuan vawiin  nileng a neih tur Training of Nodal Officers, Superintendent and Dealing Assistants i/c Court Cases chu ATI Auditorium-ah a hawng.

Department hrang hranga Court Case khawihtu officers pawimawh tak tak kalkhawmte hnenah Pu Lalsawta chuan  vawiin training tura kal te chu, resource person ten an hriat atana pawimawh tur tam tak an hrilha an zirtir tur chu dawngsawng thiam tur leh uluk taka ngaithlaa hriatthiam loh te pawh zalen taka zawt turin a hrilh a. Sorkar Ukil ten theih tawp an chhuah thin avangin tunhmaa mi tam takin Sorkar Court a khin chu a nuam khawp mai kan hneh zel tih tawngkam lar tak thin kha tunah a reh ta vang vang mai chu a lawmawm thu  a sawi a. Department a thawk Court Case khawihtu tam takin tunah chuan a pawimawh zia hriaa hmanhmawh hunah hmanhmawhin, uluk taka Para-wise Comments leh Connected Important Documents sorkar ukil te an pek vat vat thin avangin tunah chuan sorkar pawh dinhmun tha takah a ding chho ta a ni, a ti. Mahse chutih laiin khawvel changkang zelin a ken awlsam taka thuchhe neih theihna a lo tam tial tial a, department thenkhat lo in thlahdah ve leh zauh awm thin avang hian thu chhia Court Cases/Litigations hi a pung ve zel a. Hei vang tak hian vawiina training neih tur hi a pawimawh em em a ni a ti bawk.

Sorkar-in tul lova sum sen loh nan te, sorkar hnathawk tam takin an chanvo dik tak an chan theih nan te, dikna in ro a rel theih nan tea sorkar ukil te hman tur lehkha pawimawh a hun taka in pek thuai thuai hi sorkar hnathawkte rawngbawlna pawimawh tak leh dikna Pathian laka an mawhphurhna a ni tih hre reng tura chahin Law Minister chuan pawimawh ber fo chu sorkar hna hi mahni ta anga thahnem ngaia mawhphurhna la in hlawhtlin zelna tura thawk tur leh tluang takin training nei turin duhsakna a hlan a ni.

Law Secretary Pu R. Thanga pawhin thusawiin thubuai hlabuai hmachhawn dan leh chinfel na  chungchang training ah hian zir tur a ni, tiin department hrang hranga thawkte chu mamawhna leh harsatna neih te pawh inpuih theihna a awm chuan inpuih tlan a tul thu a sawi a. Sum harsa tak kara hetiang training buatsaih thei tura hmala tu Finance Minister leh sorkar chungah lawmthu a sawi.

Training hawnna kaihruaitu Pu Zahmingthanga Ralte, Joint Secretary Law & Judicial chuan mi ten thu dik famkim lo hmanga sorkar a khinna lo hmachhawnna atan he training hi buatsaih a nih thu a sawi a. The Mizoram Lokayukta Act, 2014 and Mizoram Lokayukta Rules, 2015 chuan sorkar hnathawk tam zawkin an property return an thehluh loh thu  sawiin Lokayukta Dan hnuaiah chuan kum tin 31^st July ral hmain sorkar hnathawk zawng zawngin a property return a thehluh a ngai tawh ang a, heng statement te hi 31^st August ral hmain department tinin an peihfel vek tur  a ni. Hei hian a fate, nupui pasal, thil neih te a huam vek a, an leiba neih nen lam tarlan tur a ni. A huna property return thehlut lo te leh dik lova information pe te chu corruption case siam sak theih an nih  thu a sawi.

Vawiin training ah hian sorkar hnathawk officer leh Dealing Assistants te an kal tha hle a, Law & Judicial  Department  Officer ten an zirtir a ni.