Nimin khan Kolasib District leh Cachar District-a District administration thuneitute hovin Counter Insurgency and Jungle Warfare (CIJW) School Vairengte, Conference Hall-ah ah Civil Adminstration meeting pawimawh tak neih a ni a. He meeting ah hian Lailapur Border-a lamlian National Highway-54 dinhmun chhe reng chungchangte, Forest Department, Police, PWD leh Power & Electricity Department-a kaihhnawih thil pawimawh hrang hrangte, District pahnih a ramri hrul a cheng mipuite himna leh boruak tha leh muanawm a awm zel theih nan District pahnih inkara ‘Outreach Programme’ neih chhunzawm chungchangte an sawiho a ni.

Meeting ah hian State pahnih ten hmalakna an neih dawn reng rengin mahni a hmalakna kalpui mai lova, engkimah inhre pawh tawna leh inhrilh tawna hma lak thin nise an ti a. Lailapur-a NH-54 chhe lai bik siam that chungchanga pawh ruahmanna siam a ni a. Vairengte Auto Stand thlang a bawlhhlawh paihna chungchang pawh sawiho niin hmalak dan tur pawh meeting ah hian sawiho a ni bawk.

Kolasib District atang hian Kolasib DC Pu Jitender Yadav, SP Pu C. Lalzahngoa, DFO Pu Saurabh Sharma, PWD EE Pu Sanghrima Chongthu leh P &E Senior Executive Engineer Pu R. Romawia, SDO(Civil) Vairengte Pu JH Lalrinmawia leh officer dang an tel a. Cachar District atangin Cachar DC Pu S. Vishwanathan, SP Pu Rajveer Singh, DCF Pu Parshanr Dhanda, Assam PWD-a EE pahnih, Sonai Circle Officer leh officer dang engemaw zat an tel ve a ni.