Vawiin khan Mizoram sorkar officer pawimawh te chuan court thubuai chungchangah meeting pawimawh tak Secretariat Conference Hall-ah an nei a, Chief Secretary Pu Van Hela Pachuau chuan he hun hi a hmanpui.
Mizoram Law Commission huaihawta he inkhawm pawimawh tak neih hi an Chairman Pu R. Lalrinawma chuan a kaihruai a. Law Secretary Pu P. Chakraborty leh GAD Commissioner Pu C. Lalsawta ten hriattur pawimawh hrang hrang an tarlang.

He meeting telpuitu Chief Secretary chuan dan leh hrai chungchang te, sorkarin thubuai hlabuai a neih angah te hian sorkar officer liante chu mi pawimawh hmasa ber an nih avangin Dan hriat kawngah tun aia uluk leh fimkhura an inzir a tul tawh a ni, a ti a. Court chu thudik pholangtu, dan leh hrai inkaihhruaina hnuaia mumal taka kal tur a nih avangin a pawng a puia court thuremna hlauh emaw huphurh emaw ngawt tur a ni lova, Dan-in a phut ang dinchhuahpuitu a ni zawk, a ti.

Inkhawm kaihruaitu Law Commission Chairman Pu R.Lalrinawma chuan meeting tobul tarlangin Chief Minister thurawn anga buatsaih a ni, a ti a. Mizoram sorkar hnuaiah thuchhe rem tur leh ngaihtuah lai mek tam tham tak a awm hi sorkar chuan a ngaihmawh avangin rang zawka chinfel dan dapna kawngah he sawihona hi buatsaih a ni, a ti. Sorkar officer pawimawh te chu an department huam chhunga thubuai hlabuai inchiah mek ngun zawka en tur leh a senghawi dan turah chak zawka kal turin a ngen a ni. Danin a kawng a zawh theih nan sorkar hotulute chu an pawimawh ber a ni tiin inthlahdah avangin thiam a channa ngei turah sorkarin thiam loh a chang thei a ni, a ti.

Thupui sawizautu Law Secretary Pu P.Chakraborty chuan dan leh hrai kenkawh kawnga tih tur leh tih loh tur tlangpui a tarlang a. Supreme Court-in a rel angin sorkar department hrang hrang inkara thubuai a awm chang chuan hemi laka hma latu tur Chief Secretary kaihhruai thuneihna sang tak Committee din a nih tawh thu a sawi. Sorkar department court thubuai nei reng reng te chuan he Committee kaltlang loh chuan engmah an bawhzui a thiang lo a ni, a ti. Department hrang hrangte chu court case an neiah te Law Department rawn ngei thin se sawt hlea a beisei thu Pu Chakraborty hian a sawi. Tunlaia Mizorama thil lar tak pakhat 'Trust' din chungchangah hian dan leh hraiin a phut te chipchiar taka hriat a tul thu leh 'Trust' kalhmang leh mawhphurhna te mipuiin zirchiang se a tha a tih thu a sawichhuak bawk.

Vawiina hetiang meeting buatsaih hi tangkai hle tura rin nihin huam zau zawk leh department hrang hrang hotute tan pawh buatsaih chhunzawm zel tum a ni.