No.400/2020-2021

Nimin April ni 16, 2020 (Ningani) khan Covid-19 avanga ram chhunga harsatna hrang hrang thleng mekah Aizawl West-I Bialtu MLA Pu Zothantluanga (Valtea) chuan a Bial chhunga veng hrang hrang - Rangvamual, Phunchawng, Sairang, Dinthar Sairang, Sihhmui leh Lungverh te tlawhin, an khawtlang mamawh dan ang zelin tanpuina chi hrang hrang a sem nghal a ni.

Rangvamualah hian an Veng chhunga mi rethei chenna in nei lote awmna BSUP building-a khawsa mek chhungkuate tan an Local Task Force hnenah Buhfai bag 5 leh Alu bag 1 a hlan a. Phunchawng Local Task Force hnenah Kut Silna (Hand Sanitizer) leh kutkawr (Glove) engemaw zat a hlan bawk. Dinthar Sairangah hian an Local Task Force hnenah Buhfai bag 5, Alu bag 2, Dal bag 1 leh Purun Sen bag 1 leh kutkawr (glove) a pe bawk.

Aizawl West-I Bialtu Pu Zothantluanga chuan Sairang-ah leh Sihhmui-ah hian hmui tuamna (mask) leh kut silna (hand sanitiser) leh kutkawr (glove) bun 50 a hlan bawk. Lungverh ah hian an veng chhunga mi chhuanchham leh harsa te tan an Local Task Force hnenah Buhfai Bag 5, Alu bag 2 leh Dal bag 2 a hlan leh bawk.

MLA Pu Zothantluanga chuan social media-a thu tam tak thehdarh mek a nih avangin a bial chhung mipuite chu Covid-19 avanga harsatna hrang hrang thleng mekah chiai lo tura ngenin, Sorkar leh Local Task Force te thuawih zel turin a ngen a. A bial mipuite chu, harsatna leh amah mamawhna an nei a nih phawt chuan, anmahni emaw, khawtlang hruaitute kal tlangin emaw, engtik lai pawha biak pawh theih leh koh theih a nih thu hrilhin, Bial mipuite tan a ding zel dawn thu a hrilh a ni. A Bial chhung Veng tina khawtlang hruaitute pawh ngenin, khawtlangah mi harsa leh chhuanchham te an awm leh awm loh ngaichang reng tur leh an lo awm a nih chuan tanpui a inpeih reng thu a hrilh bawk. A bial chhung Veng hrang hranga mi hausa leh awm thei zawk te pawh, an Veng Local Task Force kaltlanga mi rethei leh harsa te tan luang chhuak zel turin a ngen bawk a ni.