Mizoram sawrkarin tunhnaia Covid-19 dona kawnga hmanraw mamawh a chah thlen atanga Champhai District-a hman turte chuan vawiin khan Champhai a rawn thleng a. Hmanruate hi Champhai district bialtu MLA te hmalaknain a tul angte buaipui anih hnuah Special Messenger hmangin Directorate of Health Services, Aizawl tanga rawn phurh thlen a ni.

Vawiin hmanraw lo thleng tharte hawnna puala CMO Pisa tuala hun hmanah Dr. R.Lianmawia, CMO Champhai chuan Mizoram sawrkar leh Champhai district bialtu MLA te hmalaknaa Covid-19 dona tur hmanrua mamawh angte rang taka chah thlen a ni thei chu lawmawm a tih thu a sawi a. Hmanraw mamawh ang zawng zawng hnianghnar takin la awm rih lo mahse tun dinhmunah chuan mamawh ang phuhru thei tur neih a ni, a ti a. CMO Champhai bial chhungah theihtawpa inpuahchahna kalpui anih thu leh thlamuanpui tham a nih thu a tarlang tel bawk a ni.

Vawiin Covid-19 dona tura hmanrua lo thleng zawng zawngte hi Covid-19 vei damlo enkawltute’n an mamawh em em, an invenhimna tur thuam, Personal Protective Equipment (PPE) set 150, Hand Sanitizer bur 20, Glove 200, 3 Layer Mask 300, N 95 Mask 100 leh Shoe Cover 150 a ni a. District Hospital Champhai tan PPE 100, Hand Sanitizer Bur 10, Glove 100, 3 Layer Mask 100, N 95 Mask 50, leh Shoe Cover 100 a ni a. CMO Office tan PPE 50, Hand Sanitizer bur 10, Glove 100, 3 layer Mask 200, N95 Mask 50 leh Shoe Cover 50 te niin, CMO Office kaltlang hian Champhai Main Centre hnuaia Champhai District chhunga PHC 5; Farkawn PHC, Khawbung PHC, Bungzung PHC, Sesih PHC leh Hnahlan PHC-ah te mamawh dan anga semchhuah tur a ni. Vawiin hian CMO Office chuan MJA Champhai district-te hman turin Hand Sanitizer litre 2 leh hmaituamna a hlan bakah, I&PR Office-tan Hand Sanitizer litre 1 pe in, he huna tel zawng zawngte tan Hand Sanitizer bur te a pe vek bawk a ni.

Vawiin atang khan CMO Office Champhai buatsaihin CMO Conference Hall-ah Champhai khawpui chhung Sub-Centre tin atanga Health Worker pakhat theuhte pualin Covid-19 chungchang inzirtirna buatsaih a ni a, vawiin hian mi 12 an tel a, naktuk lamah a dang zawng tan buatsaih leh a ni ang. Champhai khawpui mai bakah PHC tinte huamchhunga Health Worker-te pualin PHC Medical Officer te’n training an pe dawn a, MO te pawh training tha tak pek lawk vek tawh an ni.

Tun dinhmunah Undivided Champhai District huamchhungah hian District Hospital 1, CHC 2, PHC 12, Sub-Centre 59 leh Sub-Centre Clinic 24 a awm mek a. Champhai district bikah hian District Hospital 1, PHC 5, Sub-Centre 15 leh Sub-Centre Clinic 8 a awm mek a ni.