No.6/2020-2021

Law Minister Pu TJ Lalnuntluanga, Champhai South A/C bialtu MLA nibawk hmalaknain vawiin khan a bial chhunga Covid-19 avanga inkharkhipna kalpui anih chhunga chhuanchham mai theite harsatna sutkianna tur atan, veng leh khaw tina Village Level Task Force (VLTF) leh mimal mamawh zualte hnenah Buhfai quintal 100 sem chhuah a ni.

Chhuanchham mai theite tana buhfai sem puala a thuchahah Pu TJ Lalnuntluanga chuan Covid-19 dona kawnga hlawh beisei hauh lova theihtawp chhuaha hma latu District Level Task Force on Covid-19 leh Village Level Task Force-te, Kohhran leh tlawmngai pawl hrang hrangte, damdawi lama thawktute, Sipai, Police leh Media-te inpeknaah lawmthu sawiin, ram leh hnam tana an inpekna ropui a ti a. Hri leng avanga chhuanchhamte tana tanpuina thilpek petu zawng zawngte chungah thinlung takin lawmthu a sawi bawk.

Law Minister chuan mipuite chu sawrkar thuchhuak ngaichang a, Covid-19 hri leng hlauhawm laka him zel theihna tura sawrkar leh mahni veng theuha Village Level Task Force-te thu zawm turin a ngen a. Mipuite chu harsatna laka venghim thintu Pathian hre renga, tawngtai bang lova ram leh hnam tana bei zel tura chahin, thenkhatin tawlailirte an ring a, thenkhatin sakawrte an ring, keini erawh chuan Lalpa kan Pathian hming chu kan lam zawk ang, ti a. Sawrkar in hri leng dona kawngah theihtawp a chhuah thu sawiin, mimal ang tak pawhin a bial tan theihtawp a chhuah chhunzawm zel tur thu a sawi a ni.

March ni 26, 2020 khan Law Minister Pu TJ Lalnuntluanga chuan a bial chhung 24-Champhai South (A/C) huamchhunga Covid-19 dona atana thawktu Village Level Task Force-te hnenah kut tihthianghlimna (Hand Sanitizer), Hmaituamna (Surgical Mask) leh tangka fai Rs 2,35,000/- a lo hlan tawh bawk a. March thla laihawl vel khan Minister hian MLA Fund hmangin Covid-19 dona atana a tul ang anga hman turin District Level Task Force on Covid-19, Champhai hnenah cheng nuai 1 a lo hlan tawh bawk a ni.