COVID-19 kaihhnawihah mipui tiralkhel zawngin tunlai hian social media-ah thuthang belhchian dawllo tam tak a chhuak thin a. Thudiklo thehdarh chingte hi sawrkar dan leh thupek kengkawh tuten an chhui a, mi engemawzat thubuai siam sak an ni tawh a ni. He hri leng mek chungchanga sawrkar hmalakna leh Mizoram dinhmunte englaipawhin I&PR Department chuan mipui hriat turin a puangzar reng a. Hengte hi ngaihvena, ngai chang tur leh thudiklo thehdarh lo tura fimkhur turin I&PR Department chuan mipuite a ngen tak meuh a ni. 

I&PR hian website – dipr.mizoram.gov.in bakah facebook page (Department of Information and Public Relations, Govt. of Mizoram), instagram (dipr_mizoram) leh twitter handle (@dipr_mizoram) a nei a. Heng media hrang hrang kaltlang hian engtik lai pawhin sawrkar thupuan rintlak leh belhchian dawl a tichhuak thin a ni. Mizoram sawrkarin COVID-19 chungchangah mipui chiai lo tur leh Health Department hmalakna leh Sorkar hmalakna hrang hrangte hi mipui hnena puangzarin thuchhuah a siam reng reng chu I&PR kaltlang a nih thin avangin mipuite Sorkar thu chhuak lo ngaichanga zawm theuh turin ngen kan ni e.