Ram pum huapa Veterinary Doctor inzawmkhawm pawl, Indian Veterinary Association (IVA) chuan COVID-19 hrileng chungchangah thuchhuah siamin, COVID-19 hrileng lakah mipuite chi-ai lo turin an ngen a. Mipuite himna tura Sawrkar in a tihte leh ruahmanna a siamte chu ngaipawimawh a, zawm ngei turin mipuite an chah a. Kut silfai that te, damlo leh damlo enkawltu te’n uluk taka hmaikawr (mask) vuah te leh COVID-19 hri kai ni a hriatte leh mahni inringhlelte hriat chhuah vat a, inkhunghrante hi COVID-19 laka inven nana thil pawimawh ber a ni tih hre turin mipuite an chah bawk.
IVA chuan arsa leh artui hian COVID-19 nen inkungkaihna emaw inhnamhnawihna emaw engmah a nei lo tih an tarlang a. Mipuite chu ar vulh, arsa leh artui ei a him tih tarlangin, COVID-19 vei palh a mihring taksa in a do let thei nan arsa leh artui ei chu thil tha niin an tarlang bawk a ni.
