Tun lai hrileng mek laka invenlawkna kalzelah vawiin khan India leh Myanmar inkalpawhna hmunpui ber Zokhawthar chu District Official-te’n tlawhin, India rama rawn hawte enthlaka dah lailawkna tur Quarantine Centre leh rinhlelh an awm thulh pawha dah hranna tur Isolation Centre buatsaih dan turte enfiah a ni a. He hunah hian Pu Mark Lalthanliana, Addl DC, Pu C.Lalengliana, Addl SP, Dr. Lallawmkima, DIPRO leh Pu Vanlalmuanawma, SDO, PHED  leh Zokhawthar khawtlang hruaitute an tel a ni.

Zokhawthar khuaa hmunhma hrang hrangte enfiah niin, Myanmar kaltlanga India mi rawn haw turte  ni 14 chhung enthlaka dah lailawkna hmun tur atan Land Customs Station, Hotel Paradise, Zokhawthar English Medium School (ZEMS), Zokhawthar Higher Secondary School  leh Zokhawthar YMA Hall-te chu tlawha zirchian anih hnuah Land Customs Station chu thlanfel niin, naktuk atangin quarantine facilities peihfel tura cheibawl tan nghal ani ang. Ramri kana rawn haw Medical Screening tih hnua rinhleh palh an awm thulh pawha dah hran nghalna  hmun Isolation Centre tura State sawrkarin a ruat  Zokhawthar Tourist Lodge chu tlawha hmunhmate enfiah a ni a, a ranglama cheibawl nghal tur a ni.

Zokhawtharah hian nitin khawsaknaa ei leh in mamawh essential comodities kan tih mai, India leh Myanmar Trade Agreement, 21.1.2004 a siamin a phal chinte  chu venhimna khauh tak hnuaiah lakluh a ni a. Zokhawthar hmunah hian Medical Screening Team-te chetvelna tur hmunhma pawh changtlung zawk puahchah mek niin, Medical Screening hi vawiin ni thlengin mi 1073 tan tih tawh niin, Covid-19 natna kai rinhlelh  an la awm lo a ni.