Lawngtlai District Level Task Force on Coronavirus Outbreak chu vawiin khan an Chairman, Lawngtlai Bawrhsap Pi Shashanka Ala, IAS hovin a office chamber-ah an thu khawm a. Novel Coronavirus (COVID-19) hrileng mek kaihhnawiha hma lak tawh dan thlir hovin, hma lak zel dan tur an sawi ho.

District level task force-in a hmaa a lo rel tawh ang leh state sawrkar atanga hma lakna tur hriattirna dawn ang zelin he hrileng laka district mipuite an him theihna tur leh he hrileng hi Lawngtlai District chhunga a darh lohna turin fimkhur taka hma lak chhoh mek a nih thu he thut khawmah hian tar lan a ni a. District chhung luhna ramri-ah te medical team, police leh YLA volunteer-te duty-in, screening an kalpui a, mipui zirtirna pawh kalpui reng a ni bawk.

District Level Task Force chuan fimkhur thuhlaa inven nan District mipuite chu tul bik thil a nih loh chuan khawlai chhuak tam lo tur leh in lama tawmim turin a chah a. Loh theih lohva chhuah a ngai a nih pawhin, fimkhurna dan zawm turin a ngen a. Lirthei tui (petrol leh diesel) te pawh rikrum thila hman atan khuahkhirh nghal niin, tum khatah tam tak a lak theih dawn loh va, khawlai chhuah tam loh a him ber avangin inchuh buai pawh tum lo turin mipuite ngen an ni.

District chhung luhna hmun thum - Thingkah, Sangau leh Chawngteah te endikna hmun screening point siam nghal a ni dawn a. He lai pal tlang reng reng chu endik vek tur niin, mipuite pawh khua leh tui tha an nih anga thuneitute ruahmanna zawm turin ngen an ni a. State pawn atanga zirlai, sumdawng leh zin lo haw reng reng leh khualzin lo lut turte pawh thuneitute hnenah inhriattir zel tur leh ni 14 chhung tal in lama inkhung hrang tura beisei an ni. In lama inkhung hrang tura tih zawm lo an awm a nih chuan khawtlang hruaitu (VC)-te leh tlawmngai pawlte'n thuneitute hnena hriattir zel tura ngen an ni bawk.

Lawngtlai District chhunga kohhran tinte he hrileng darh theihna remchang - inkhawm leh mipui pun khawmna dang siam rih lo turin District Level Task Force chuan a ngen a. Pawl hrang hrang leh mimal te pawh heti ang programme hi siam rih lo turin a ngen bawk. Khualzin phur sumo leh bus-te pawh a theih hram chuan tlan rih lo tur leh, tlan a tul a nih paw'n state pawn atanga lo lette phur lo tura fimkhur turin a chah a. Hemi kawngah hian hri an lo kai thulhah passenger dang an kai chhawn theih dawn avangin fimkhur a tul a ni. Lawngtlaia sawrkar officer-te pawh district chhung chhuahsan rih lo tura hriattir an ni bawk.

Home quarantine (mahni ina inkhung hran) a harsat thulha inkhung hranna tur quarantine facility atan District Hospital Lawngtlai building sak mek leh thawktu quarters sak mekte chu ruahman niin, vawiin khan Bawrhsap ho hian en nghal a ni a. Luah nghal theih turin rang taka buatsaih fel tura tih a ni a. He hmunah hian mi 45 leng thei tura ngaih niin, a mamawhte chu damdawi in thuneitute hnenah inhriattir theih a ni.

COVID-19 laka fimkhur thilah District Hospital-ah hian Isolation Ward pawh ruahman fel tawh a ni a. Khum 7 awmin, doctor leh nurse duty pawh siam a ni tawh a. Vawiin atang khan OPD-a inentir turte chu khuh leh hritlang nei an nih chuan OPD-a an luh hmain COVID-19 Screening Point ruahmanah endik hmasak zel niin, vawiin khan chuti ang mi 14 chu endik an ni a. Endikna leh an chanchin zawh chian atangin COVID-19 vei thei dinhmuna ding erawh tu mah an awm lo thung.

COVID-19 hi a hri vei nena inawm pawlh atanga awlsam taka inkai chhawn theih a nih avangin District Level Task Force chuan fimkhur theih tawpa fimkhur a, a theih chen chena inven lawk a tul niin a hria a. He'ng fimkhur thuhlaa ruahmanna siam avang hian mipuite chu chi-ai mai lo tura chahin, fimkhurna tur leh invenna tura ruahmante chu tha taka zawm theuh turin a ngen tak meuh meuh a ni.