Zoram mipui duhtak te u,


Hei kan hriat theuh angin tunah chuan hripui hlauhawm tak, Novel Coronavirus an tih chuan khawvel a tuam mek a. Chumi ah chuan sawrkar lian a ni emaw, sawrkar te a ni emaw, min huam ta deuh vek mai a. Thihna tam tak leh manganna tam tak tunah hian kan tawng tlang a ni a. Hemi hi Mizoram in lo su ve turin kawng tinrengin kan inbuatsaih a. Mizoram sawrkar chuan inbuatsaihna kawng chi hrang hrang kan ngaihtuah a. Chuta tan chuan a bikin Cabinet meeting pawh vawi hnih ko tawhin, hmalak dan tur kawng chi hrang hrang siam a ni a. Tunah pawh department leh thawktute pawhin hma kan la char char mek zel a ni. Tichuan chumi chuan State Level ah Task Force din in, ram pumah, district leh khaw tina kal dan tur kaihhruina kenkawh dan turah hma an la a. State level ah Chief Secretary kaihhruaina hnuaiah din in,  district level ah pawh District Commissioner hnuaiah task force awmin, veng tin leh khaw tinah Local leh Village Council huamchhung theuhah local task force din leh a ni a. Heng task force ah hian mi hrang hrang a tul ang angin kan inlakhawm a hnathawk turin. Hemi kalna tur hian sorkar pawhin theihtawpin hma a la a ni.


A pawimawh ber chu state dang leh ram dawng pawhin an lo sawi thin "kan lo strict tawklo a ni" tih hi a ni a. "Kan strict lutuk a, a hrehawm" ti zawnga phunna te chu a tirah awm mahse a rei chuan a lo tha tih chu hriattlan a ni. Chu chu ram dangin an lo hmachhawn tawh a nih avangin hre reng chungin keini pawhin kan tih chinah a strict thei ang berin tan kan han la a ni. 


India ram leh khawvel ram dang pawhin a tih leh keini pawhin kan tih chu puipun khawmna tih tlem a ni a. A hmasa berin CrPc Section 144, mi panga aia tam punkhawm phallohna thupek chu hman a ni a. Amaherawhchu rorel tur leh thil tul dang ngaihtuah turin chhuah ngaite an awm a. Chungah pawh chuan a tlem thei ang bera tih a ni a. Sawrkar pawhin thu pawimawh sawiho tura mi tam tak thutkhawm a him tawk loh avangin kan theih ang tawkin telephone hmangin kan sawi thin a. Kohhran inkhawm te nen lamin chawl rihin, kan vaiin fimkhur takin tihloh tha kan tih vangin kan kal a ni a. Hun reiah chuan a lo that zia kan hria ang. Sawrkar pawh telephone hmangin thurawn min pe ang a. A tul tawpa inhmuhkhawm ngaihchang pawh a la awm thei maithei bawk a. Mahse theih chin chinah chuan awmkhawmloh hi tih tur a ni..


Sawrkar laipui chuan Prime Minister hovin India ram pumah lock down te puangin hma a la a. Amaherawhchu India ram sawrkar a chet hma in Mizoram sawrkar chu kan lo che hmasa tawh zawk a. Thlawhna te pawh India ram chhung a thlawh tawp an tih hma in keini chuan kan airport Lengpui a thlawh luh leh chhuah chu kan lo titawp tawh a, kawng hrang hrangin chet kan lo la hmasa tawh a ni. Amaherawhchu hemi avang hian harsatna chu kan tawk ngei a. Kan Mizoram House a kan Resident Commissioner leh Deputy Resident Commissioner te pawh ka phone kim vek a. Harsatna lian an neih loh thu te lo sawiin, tangkhang tlem awm te pawh an lo enkawl mai tur thu te an sawi a. A tul ang zelin hengte hi kan in pui zel dawn a, kan RC leh DRC te pawh instruction kan pe zel dawn a ni.


Kan Lok Sabha MP pawhin India ram hmun hrang hranga tangkhangte pui turin hma a la mek a, a tul ang zelin MP Fund atangin Mizorama hman tur pawh pek a nih tur thu a sawi a ni. Chutiang bawkin Rajya Sabha MP pawhin he natna hrileng kan dona atan hian sum lo thawhin kan lawm takzet a ni. Tin, chutihlai chuan CM Relief Fund kal thin pangngai kha a chhunkhawmna remchang a ni ang tiin miin an rawn thawh a, an rawn thawh mek zel bawk a. A lawmawm kan ti tak tak a. Hengte hi a tul ang leh tangkai tur ang berin kan hmang dawn a ni.


Sawrkar kan inbuatsaihnaah mipui ten harsatna kan neih a, hnathawk lova ina kan awm chuan ei leh bar tur leh chaw ah harsatna tawk thei kan nih avangin kan Supply Department chuan thla khat chhung chu a harsa zual tan a thlawnin buhfai pek theih an nih thu rawn sawiin, tichuan sawrkain a man chu kan tum vek dawn a. Tunah hian April thla chhung chu kan BPL leh AAY te a thlawnin buhfai kan pe vek dawn a. Hengin a huam loh harsa zual bik te tan Local Task Force ten an hmuh tawh phawt chu kan tanpui zel ang. Tumah chhuanchham leh harsa in an awm lohna turin sawrkarin hma la in pawisa pawh a tul ang zelin kan hmang dawn a. Tin, he Coronavirus beihna atana tan lo lakna atan sawrkar sum hi a tul ang zela ren lo leh tangkai thei ang berin kan hmang zel dawn a. Mipui thlabar a an awm kan duhlo a ni.


Supply chungchang thu ah hian Supply Committee hi State Level Task force hian din in an ngaihtuah zel a. Entirnan, kan buhfai sem darh theih dan tur tha ber te, kan thlai leh buhfai leh ration supply, hmun dang atanga lo kal tur, a lo kal loh palh a harsatna kan tawk dawn em tihte ngaihtuahin, thlai hnah leh chawhmeh tur dangte lakkhawm a, mipui hnena hralh dan tur tha tak tak lakkhawmna tur motor mamawhna leh thildang vangin lakkhawm theih lovin a awm a. Chung chu kan supply committee pawhin ngaihtuahin hna pakhatah an nei mek. Tun dinhmunah kan hmanraw pui berte chu kan Local Task force te hi anmni a. Anni hian kan nitin mamawh lei thu ah hian remruatna an siam ang a. Wholesale na hmun atanga lei dan te leh rualkhai taka vengchhung mipuiten an mamawh an neih theih nana sem dan tur ruahmanna felfai taka siam tura hrilh an ni.


Kan Zoram Medical College ah he natna vei an lo awm palh a awm dan tur lo ruahman lawk vekin a hma atang tawh khan inbuatsaih lawk tawh a ni a. Tunah vei kan neih chhun pawh hian mipui tan venthawn tur leh buaina tur a awmlo a. Positive case dang lo hmu leh palh hlauh pawh ni ila mipui te chi ai lo ila. Kan doctor leh enkawltu dangten ruahman lo siam sa tawh angin theihtawp chhuahin, inpumpek thlapin an thawk mekin an thawk zel dawn tih hre turin kan inchah a ni e. Chuan damlo enkawltute hian an invenna tur mamawh hrang hrang chu Delhi ah an siamin a hmunpuiah kan chah a. Tunah hian Mizorama a lo thlen vat theih nan Lengpui airport ah emaw a lon thlen theih nan kawng kan ngaihtuah mek a ni.


Kan covid-19 hrik test na tur hi India ramin a khawl te pawh a nei tawh a. Mahse a test na tur pindan hran leh ruahmanna hrang hrang a ngai a. Chung chu tunah hian rang takin sawrkarin a tul anga pawisa sanction in thawktute an thawk char char a. Mizoramah nei ve thuai turin hma kan la a ni.


A hnuhnungah chuan lawmthu ka sawi duh a. A hmasa berin kan task force te chungah lawmth atan sawrkarin ngaihtuah kan tum a. Kan task force te chungah lawmthu sawiin, tha taka an thawh zelna turin tawngtai ila a tha a ni. A dawt lehah chuan kan health department a thawktute, kan doctor leh nurse leh damdawi hnathawktute chungah lawmthu kan sawi a. Anmahni tana hlauhawm em em ngaihtuah lo a hetia an thawk char char mai hi sawisel tur a awmlo. Mizo tlawmngaihna dik tak nen an duty dik tak an ti a, chuvang chuan mipuiin lawmthu i hrilh ang u. An tan hriselna tha an neihna turin i tawngtai ang u. A dawt leh ah chuan duty te, international border leh state boundary pawh khar vek khan a hawn awm chhun a duty te kha an fakawm em em a ni.


Fund thawhtute chungah pawh lawmthu kan sawi a. Tunah rih chuan mipuite atangin thawk tura sawmna kan la siam rihlo a. Tunah rih chuan theihtawpin sawrkarin tan a han la ang a. Chutih chhung chuan mahni tlawmngaihnain rawn thawh an awm reng bawk a. Heihi lawmawm kan ti a. Nakinah indaihloh chin a lo awm a, mipuite pawh tang tura kan han intih hun a lo la awmpawh a ni thei. Amaherawhchu tunah chuan sawrkar sum leh mi tlawmngaite thawh nen kan la kal theizel hi a lawmawm a ni. A dawt leh ah chuan kan thlai thar, buhfai leh nitin mamawh phurtute chungah lawmthu kan sawi duh a. An tan a risky em em a, chaw eina tur hotel mumal awm tawh lo chungin tlawmngaih chhuah tak meuh an thawk a ni.


Mipui chungah lawmthu kan sawi duh bawk a. Mizote chu kan discipline a tha em em a, thu kan zawm tha thei hle a. A tirah buaina leh remruat fellohna avanga thil kal fuh tawklote chu han awm bawk mahse tunah chuan chutiang a awmlo a. A reh thup mai a. Ram mipuite zawng zawng chungah lawmthu kan sawi a. Thlamuang taka awm turin kan duh a ni. Tin a hnuhnungah chuan kan Mizoram Kohhran Hruaitu Committee chungah leh kohhran zawng zawng chungah lawmthu kan sawi duh a. Hreh tak chungin inkhawm kan titawp vek a. Zingkar tawngtai kalkhawm leh thildang pawh kan han ti tawp vek a. Kan kohhran hruaitu ho ten tawngtaina tur hun bik te an siam a. Ram pum kan tawngtai hun te min han siamsak a, lawmawm kan ti.  Kan vaiin kan kohhran hruaituten an ngenna ang hian i tawngtai ang ula, Pathian i au theuh ang u tih kha kan kohhran hruaitute rawtna thlawpin kan sawi tel a ni.


A tlawngkawmnaah chuan, hetiang kan nih takah hian sawrkar te ber leh chak ber pawh kan inang tlang vek mai a. Eng thu nge maw hetah hian Pathian hian min hrilh a tum le tih ka ngaihtuah chang hi chuan ka rilru a Bible chang lo lang hmasa chu "Ngawi ula, Pathian ka ni tih hre rawh u" tih a ni. Keini Mizote hi ringtu, kan famkimlohna tam tak karah pawh a koh anga awm tum tu te kan ni a. Tunah phei chuan khawvelah mahni mipuite tam dan chhut phei chuan missionary tir tam ber kan ni. Tin keini tluka a hnam anga Chanchintha hril tura hman tur remchang kan awmlo an an ti thin. Chuvang chuan Pathian in Chanchintha hril tura min duhna hi tunah a aw kan hria. Kan rilrua kan hriatreng tura ka duh chu heng harsatna rapthlak pui pui lo thleng karah hian Pathian hian min hrilh duh a nei a ni tih hria in, ngaihven theuh ila. Kan Bible changin min hrilh angin Lalpa remruatna chu a tak a, a fel vel vek a, a tih kha hre rengin Zoram mipuite thlamuang takin awm ila. Sawrkarin theihtawpin kan ti ang a, thawktuten theihtawpin an ti ang a. Kan Pathianin kan zawh loh khawp phurrit kan chungah a tlak tir lo ang tih hi i ring nghet ang u.


Zoram mipuite zawng zawng in vaia chungah lawmthu ka sawi a, chibai ka buk a che u.


Ka lawm e.