IGP (Hqrs) leh Chief Public Relation Officer, Mizoram Police Media Cell ni bawk chuan COVID-19 chungchanga a hnuai ami ang hian thuchhuah a siam.

COVID-19 chungchang avanga mipuite ralkhel taka an awm laiin 09.03.2020 (Thawntanni) khan Social Media (Whatsapp) ah hetiang hian thu a darh a - 'Ka hmelhriat hnaivai Health Dept (Civil Hosp) a thawk atanga chanchin ka hriat dan in tunah hian COVID-19 confirm case pakhat Aizawl ah vawiin khan hriat a ni a. Kan chhungte leh thian thate kan lo fimkhur nan i inhrilh ang u' tih leh 'Breaking news ITI Veng ah COVID-19 suspect a awm a nia. Singapore atanga lo haw. Referral Hospital ah dah an tum a, mahse an duh lova, nichin mai khan an phur phei dar 3:00 vel a niang. Ka chhuahna tanga ka rawn hriat'. Hei hian mipui a tithlabar leh zual a, hemi avang hian Police ten thu dik a nih leh nih loh, an chhui nghal a ni.

COVID-19 vei nia an sawi hi zawnchhuah a ni a, amah hi hmeichhia kum 31 mi niin 14.10.2019 khan Singapore ah a lut a, 02.03.2020 ah Mizoram ah a lo haw leh a. A haw kawngah hian Kolkata leh Lengpui Airport ah te amah hi en dik vek a ni a, engmah
buaina a nei lo a ni . He natna symptom (lan chhuahdan) nia sawi hritlang leh awmna pawh a nei lova, khawchhak (Singapore) lam atanga lo haw a nih avangin Doctor ten enfiah an duh a, chutih chhung chuan amah pawh pawn chhuak hrih lo turin thu rawn an pe a ni. Coronavirus hi a kai tihna a ni lova, a zinna ram avanga en dik ngaia hriat a nih vang chauh a ni.

Thudik hrulah thu belhchian dawl lo belhin mipui rilrua thlabarna tuh thei thil social media-a post thin hi a pawi hle a, hemi chungchanga thu dik tawklo post darh tu te hi mi 11 (sawm pakhat) chhui chhuah tawh an ni a, an ni hi social media-a an thu hmuh group danga post chhawng leh tute an ni. Thu dik leh dik lo thliar hrang lova kan thu dawn te post chhawn (forward) zung zung hi dan in a phal lova, heng mi 11 (sawmpakhat) te hi man an niin Vaivakawn PS Case No.54/2020 Dt.10.3.2020 u/s 505 (l)(b) IPC ziah luh a ni. Charge section hi Non Cognizable a nih avangin Cognizance hi Chief Judicial Magistrate, Aizawl atanga hmuh a ni a. Anni bakah hian he thila inhnamhnawih dangte pawh zawn mek an ni a, hriatchhuah an nih nun ah man leh an ni ang.