Vawiin khan Commerce & Industries Minister Dr. R. Lalthanglianahovin Secretariat Conference Hall ah SEDP hnuaia Industrial Development Board an thukhawm a, Industrial Development Board Vice Chairman Pu C. Ramhluna leh Board Member-te bakah Commerce & Industries Department leh Geology, Mining and Mineral Resources Department hotulu te an tel a ni.

Dr. R. Lalthangliana chuan hlawhtling ngei ngei tur proposal leh project kan neih a pawimawh a, a tul anih chuan a hmuna ngei Board Member te leh a mawhphurtu Department ten enpui a tha a, chutiang turin hma lak kan tum a ti a. Project leh proposal reng rengte hi Board kaltlanga ngaihtuah turin lut zel se tia a duh thusawiin hengte hi Board in hriatpui zel ila, hetiang ang hian kalphung thar kan siam a ngai dawn a ni, a ti bawk. Mizorama industry lamah hmasawnna a awm thei nan KVIC leh Ministry of Textiles te leh Central body dang te hmang tangkai a tul a chutiang angin Board in hmalak kan tum dawn a ni, a ti a. SEDP hlawhtlin nan Industrial Development Board chu peng pawimawh tak leh thawhhlawk thei tak nia a ngaih thu a sawi bawk.

Vawiina Board meeting ah ngaihtuah tura thuchhawp chhuah hrang hrangte sawikhawmin thu engemaw zat rel a ni a. Thalai lehkha thiam te rilru ah mahni kut kea entrepreneurship hmanga eizawnna kawng an ngaihtuah thei nan Government J. Thankima College a Industrial Demo Chamber atana building mamawh sak nan sum pek chu remti a ni a. Phainuam BRP Brick Factory Self Help Group in leirawhchan siamna project an thehluh chu a hmunah Board Member leh Department aiawh te kalin en phawt nise an ti a. SEDP Apex Board in Handloom Sector tih hmasawn nan Pilot Project atana cheng nuai 260 a ruahman chu beneficiaries te pek dan sawiho niin hemi hnuaia loom sem tur te chu a siamtu tur uluk taka thlan nise an ti a. Hemi ruahmanna hnuaia beneficiary puantah mi 146 te khawl leh buangrua pek an ni dawn a ni.

Baktawng Carpentry Cluster atana state matching share thawh tur chu a rang lamah bawhzui nise tihrel a ni a. District 11 atana Baseline Survey chu tan vat nise tiin hemi atan hian District tin atana cheng nuai 1 zel ruahman a ni a. Commerce & Industries Department hnuaia District tina District Industries Centre te chu SEDP hlawhtlinna tur project leh proposal tha ngaihtuah chho zelin Board a thehluh nise tih rel a ni a. Grant-in-Aid Scheme hnuaia ruahmanna awmte chu SEDP nena thlunzawma kalpui nise an ti a. Balu leh lung tha lakna inkalpawhna kawng tha lo siam nan Mineral Link Road siam chu Board in an pawm a, hma la turin Geology, Mining and Mineral Resources Department chu mawhphurna pek an ni. Heng bakah hian Border Trade Centre te tihchangtlun dan leh tunah Industrial Area neih mekte tihchangtlun dan leh District thar 3 atan Industrial Area atana ram mamawh chungchangte pawh ngaihtuah a nibawk.

Industrial Development Board ah hian Commerce & Industries Department dinhmun sawiho a ni a, thawktu indaihlohna avanga harsatna hrang hrang tawh mekte sawilan niin Commerce & Industries Department then(bifurcate) chu thil tul tiin hemi chungchang hi a rang lamah ngaihtuah turin Sawrkar ngen nise an ti bawk.