No.3136/2019-2020
Vawiin chawhma khan District Disaster Management Authority, Kolasib te chuan Pu Vanlalchhuanawma Chawngthu, SDO (Sadar) pisaah COVID-19 lak a mipuite himna tur atan a National Disaster Management Authority in a duan, COVID-19 vei rinhlelh te enkawlna tur district tinah hmun 5 ruahmanna siam tur a tih bawhzuiin thutkhawmna hun an nei.

He hunah hian Kolasib district chhung a mi 50 awm theihna tur sawrkar, mimal leh sumdawnna in awm hrang hrangte, National Disaster Management Authority-in a phut ang a hman theih tur te thlanchhuah a sawi ho a ni a. Kolasib district chhungah hmun panga (5) chhinchhiah niin COVID-19 kai rinhlelh enkawl ngai an awm palh a hman tangkai a nih theih nan a tul anga hmalak ni se, ti a rel a ni. Hemi rual hian NDMA in a phut ang, District chhung a Healthcare facilities, COVID-19 vei rinhlelh mi 20 dahhran a enkawl theihna tur hmun ruahmanna pawh rel fel nghal a ni a, hemi atan hian District Hospital, Kolasib leh Kolasib District chhung a Community Health Centre te tangkai tak a hman tum a ni.

Kolasib District Level Task Force on Corona Virus Committee ten thutkhawmna nei chhunzawmin, Kolasib district paltlangtu National Highway a COVID-19 Screening kalpui dan te, ram pawn atanga rawn haw, Home quarantine a dah te enkawl dan leh dinhmun te leh District Level Task Force ten chak zawk a hma an lak theih nan khawtlang pawl hrang hrang thawhpui a sawm a tul thu te ngaihthlak a ni a. Dr Lalhlimpuia, CMO Kolasib chuan February Ni 11, 2020 atanga Vairengte leh Bairabi a Screening an kalpuinaah vawiin thleng a COVID-19 vei rinhlelh an la awm loh thu a sawi bawk a ni. Dr RK Lalthlamuana, SMO chuan in lam a enthlak zui ngai, Home quarantine a dah mi 13 zingah COVID-19 kai rinhlelhawm tumah hmuhchhuah a la nih loh thu leh heng zing a mi 4 te chu him tak a enthlak hun chhung an paltlang tawh thu a tarlang a. Home quarantine pawimawhna leh khauh tak a zawm a ngaihna te mipuiin an hriatchian leh zual a tul thu a sawi bawk a ni. Kolasib district sawrkar department hrang hrangah kut silna hmun leh COVID-19 lak a kan inven ve theih nana kan hriattur pawimawh te ziak a tar theuh nise tih committee chuan a rel a, veng tin a aurinna hmang a mitin kan fimkhur tlan theih nan inzirtirna thu puan nise tih rel a ni bawk.