No.3146/2019-2020

Vawiin tlai khan Lunglei HPC Vice Chairman Pu Lawmawma Tochhawng chuan Lunglei Civil Hospital tlawhin tunlaia natna leng mek Covid-19 laka lo invenlawkna leh inpuahchahna kal mek a hmunah a enfiah. HPC Vice Chairman hi Medical Superintendent Dr SR Ngurchamliana, CMO Dr Thani Pachuau leh H&FW Department hnathawkten anlo dawngsawng a ni.

Lunglei Civil Hospital Medical Superintendent Dr SR Ngurchamliana chuan Covid-19 laka lo invenlawkna leh inpuahchah kal mek sawifiahin Lunglei District-ah Coronavirus vei hmuhchhuah lo awm ta se rang taka chet la thei tur ‘Rapid Response Team’ ruat an nih tawh thu a tarlang a. Hengte hi Lunglei District SMO leh District Surveillance Officer ni bawk Dr Lalrinthangi, Dr Isak Lallawmkima, MD Specialist, Pi C.Lalbiakzami, District Nursing Superintendent, Pu Lalruatkima, CMO Office leh Medical Mobile Unit Team (6 Nos) te an ni. Tin, Covid-19 vei anlo awm anih chuan anmahni dah hranna tur “Isolation Ward” pawh ruahman tawh niin he Isolation Ward ah hian khum panga (5) – mipa tan pathum leh hmeichhia tan pahnih a awm a. Isolation Ward ah hian attached bathroom pahnih leh medical duty-te awmna tur room hran leh eirawng bawlna choka hran a awm bakah a panna tur hranpa step a awm a ni. He Isolation Ward-a duty tur hian Dr RSC Vanlalruati, Microbiologist leh Dr Lalfakzuala Renthlei, Chest Physician te ruat fel an ni tawh a. Tin, a tul anga hman tur ventilator panga a awm bawk a ni. Lunglei Civil Hospital hian tun dinhmunah District chhunga medical staff zawng zawng te tan Coronavirus chungchang training a buatsaih mek a, awareness campaign pawh zau zawka kalpui zel turin hma an la mek a ni.

Lunglei HPC Vice Chairman Pu Lawmawma Tochhawng chuan H&FW Department, Lunglei District in inpuahchahna tha tak an lo nei chu lawmawm a tih thu sawiin hnathawktute thawhrimna leh inpekna avangin an chungah lawmthu a sawi a. HPC Vice Chairman chuan Coronavirus chungchangah mipuite chiai lo tur leh anmahni zawn theuha fimkhur tura chahin he hri inkawichhawn awlsam tak laka inveng turin social distancing - mipui punkhawmna buatsaih loh leh kal loh a tul thu a sawi a. Tin, he hri leng chungchangah social media lama thudiklo thehdarh an awm fo chu pawi a tih thu tarlangin mipuite thudiklo thehdarh lo tur leh sawrkar thuchhuak ngaichang thin turin a chah bawk. Khawsik, Khuh ro, thawk lama harsatna leh inrinhlehna neite chuan sawrkarin Lunglei District tana COVID 19 helpline a siam te : 9774631304, 9436361845 leh 9862816040 te chu engtiklai pawhin phone theih an nih thu tarlangin heng number-te hi hmang tangkai turin mipuite a chah bawk a ni.