No.3147/2019-2020

Vawiin tlai hian Serchhip District Task Force Committee on Novel Coronavirus (Covid 19) te chu DC Meeting hall ah an Chairman Pu H. Dolianbuaia, DC hovin an thukhawm a, Serchhip District chhunga he natna laka inven dan tur chi hrang hrang an rel.

Chairman Pu H. Dolianbuaia’n meeting koh a nih chhan te, he natna hi sawrkar chuan Disaster anga lo hmachhawn tura ruahmmanna a siam thute a sawifiah hnuah, Dr. Laldawngliana Sailo, Chief Medical Officer, Member Secretary ni bawk chuan Novel Coronavirus chungchang leh Health Department lam atanga Serchhip District inbuatsaihna tlangpui report a pe a, District chhunga PHC, CHC leh District Hospital ah te Covid-19 vanga damlo te dahna tur hmun siam vek a nih tawh thu a sawi a. Mahni in lama inkhung hranna neilo tan District Hospital ah hmun zuat a nih tawh thu a tarlang bawk. Dr. ZD Lalmuanawma, Medical Superintendent leh Dr. Lalhlunpuii, DIO te pawhin thil pawimawh nia an hriat te an tarlang ve bawk.

Vawiina meeting chuan, district magistrate order anga state pawn atanga lo haw te in report-na tur leh an inkhung hran dan tur a ngaihtuah a. Foreign leh State pawn atanga Serchhip district chhunga lo haw zawng zawng te chuan heng a hnuaia Helpline Number ah hian phone hmanga in report ngei ngei tur a ni a, anni hian a tul angin an inkhung hran dan tur an ngaihtuah pui thin ang. In report na tur te chu:

Dr. Lalhlunpuii, (Pi Puii) DIO Ph: 9436361253, Pu PC Laltanpuia, (Pu Tantea) Addl SP Ph: 7005356608, Pu Denny Lalchhuanawma, (Pu Denny) SDC, Ph: 9862359169, Pi Vanlalduhi Ralte, (Pi Maduhi) DO, Ph: 6009671590. Heng Number te hi tih belh emaw an Number thlak hlek emaw a la tul thei a, chutiang thil a awm chuan I&PR Press Release hmanga inhrilhhriat leh a ni ang.

State pawn atanga rawn haw natna kai rinhlelh tur awm lem lo, mahni in lama inkhung hranna nei thei te chu anmahni ina room hrangah ni 14 tal inkhung hrang vek tura hriattir an ni a. Chhungkaw member dangte nen pawha inchen pawlh lovin, ei leh in pawh a theih chuan disposable hmanruate hmanga in peka, hman hnu halral nghal zel tur a ni. Mahni ina inkhung hranna nei lote tan inkhung hranna tur Building hi District Hospital ah ruahman a ni tawh bawk a, tin heng dah hran te zingah rinhlelh emaw enthlak ngaia natna nei an awm palha a hranga dahna tur building pawh vawiina meeting hian a siam fel nghal bawk.

District Task Force chuan, state pawn atanga rawn haw, inkhung hrang tura tih ten he hmalakna hi an zawm tha lovang tih a hlau hle a. A zawm tha duh lo te chu a tul anga man (arrest) hial pawh a hreh dawn lova, Branch YMA zawng zawng te chu he hmalakna tha taka tawiawma thawhpuiah a sawm nghal a ni.

Meeting hian Serchhip District chhunga sawrkar pisa zawng zawng te chu an Pisa luhka remchang laiah anmahni dawr tute kut silna tur, tui, sahbon leh tissue paper chhawp vek turin a ngen a. Hei hi a rang thei ang bera neih tum vek turin a ti a ni. Tin, Serchhip Bazar Building (chawhmeh zawrhna) luhka tinah bazara kal/lut zawng zawng ten an luh dawn leh chhuah ruala kut an silna tur dah ngei turin bazar enkawltu department hriattir ni se an ti bawk.

Vawiina Task Force meeting hian, kohhran zawng zawnga sem darh turin ngenna lehkha a siam bawk a, in tlawh kuala thil zawrh lam chi reng reng a khap bawk.

District chhungah Covid-19 kai an lo awm palha inenkawlna tur hmanraw pawimawh thenkhat lei dan tur te pawh sawi a ni a, damlo enkawlna hmun atan building thlan pakhat, Nursing School Building pawh a tul anga chei dan an ngaihtuah nghal dawn a ni.

Heng te bakah hian hmalakna pawimawh dang engemawzat an sawi ho a ni.