No.3620/2021-2022

Dated Aizawl, the 10th January, 2022 : Covid-19 hrileng laka District mipuite himna tur leh hri kai thar pung zel tur chhutchah a nih theihna tura hmalak zel dan tur ngaihtuahin vawiin khan Lunglei DC Conference Hall-ah DC & Chairman DLTF Pu Kulothungan A kaihhruaiin meeting neih a ni. Meeting-ah hian official-te, Sub Hqrs YMA aiawhte leh VLTF hruaitute an tel a ni.

Pu Kulothungan A chuan Covid-19 hrileng do kawngah sawrkar Department hrang hrang te, kohhran te, tlawmngai pawl te, khawtlang hruaitute leh mipuite kan tanrual chhunzawm zela theihtawp kanla chhuah tlan zel a tul a ni tiin Covid hrileng mek, a bik takin Covid hri thar Omicron laka inveng turin District mipuite Covid Appropriate Behavior (CAB) ngai pawimawh chhunzawm zel turin a chah a. Lunglei District-ah tun dinhmunah Restricted Area panga - College Veng, Lunglawn, Zotlang, Sekhum leh Thenhlum a awm mek thu leh Covid-19 vei hmuhchhuah tamna hmunah Containment Zone/ Restricted Area puang thuai thin tura VLTF te nen tanho a tul thu a sawi a ni.

H&FW Department, Lunglei District chhinchhiah danin January ni 10, 2022 thlengin Lunglei District-ah Covid-19 test 1,19,893 neih tawh niin 12,359 (10.31%) positive hmuhchhuah an ni a. Covid-19 avangin Lunglei District ah mi 30 (mipa - 23 leh hmeichhia - 7) ten nunna an chan tawh bawk a ni. Covid-19 vei enkawl discharge tawh mi 12,050 niin recovery rate hi 97.50% a ni. ZMC a refer tawh mi 50 awmin tun dinhmunah Lunglei District mi pathum (3) ZMC ah enkawl mek an awm a ni.