No.832/2020-2021

Vawiin khan Mizoram Sawrkar hnuaia sawrkar hnathawkte intelkhawmna Association hrang hrang 75 (sawmsarih leh panga) aiawhte inkokhawmin ATI Auditorium, Aizawlah Mizoram Chief Secretary Pu Lalnunmawia Chuaungo kaihhruaiin COVID-19 do nana sawrkar hnathawkten contribution an pek belh dan tur sawiho a ni.

Pu Lalnunmawia Chuaungo chuan COVID-19 avanga Mizoram chauh ni lo India ram leh khawvelin kawng tin renga harsatna a tawh dan a sawi a. Mizoram kan la him rihin a lang naa India ramah chuan a ni telin a kai zat an pung a, a thi zat pawh an pung tual tual a, hei hian nasa takin khawvel pum economy a sawi nghing mek tawh a, eng ang chiaha nasain nge a tih thuanawp dawn tih hi hriat lawk theih a ni lo, a ti. Hetihlai hian Sawrkar Laipui sum hmuhna ber chhiah lakkhawm a tlahniam a, Mizoram chawmtu ber Sawrkar Laipui atanga sum hmuh zat pawh a tlem sawt ta hle tih sawiin Chief Secretary chuan kan hma hun thlirin theihtawpa sawrkar hnathawkte kan tan tlan a tul tak zet a ni, a ti a. Central atanga sum dawn zat a kiam zel laiin Budget duan laia sum senna tura chhut tel miahloh COVID-19 kaihhnawiha sum tam tak sen ral a lo ngai ta a, chuvangin COVID-19 dona tur leh tumah chhuanchham kan awm lohna turin mahni theihna zawn theuhah tan lak a ngai a ni, a ti.

Association hrang hrang aiawh kalkhawmte hian Mizoramin he hun harsa a tawn mek thlir chung leh an member-te dinhmun thlir chungin rawtna engemawzat an chhawp chhuak a. Chung zingah chuan lungrual takin kumin December thleng hian Mizoram Sawrkar hnuaia Group A, B leh C ten an hlawh (basic pay) atangin 10% leh Group D ten an hlawh (basic pay) atangin 5% thawh (contribute) an rem ti.

Vawiin meeting-ah hian Chief Secretary bakah Additional Chief Secretary to CM Pu JC Ramthanga, Finance Commissioner Pu Vanlalchhuanga, Planning Secretary Dr C.Vanlalramsanga, Home Secretary Pi Lalbiaksangi te pawh an tel a. Chief Secretary chuan meeting hi khaikhawmin Mizoramin hun harsa kan tawh mek laia Mizo tlawmngaihna rilru dik tak pua lungrual taka sawrkar hnathawkten an hlawh atanga sum tam tak pekchhuah an remti chu lawmawm a tih thu a sawi a ni.