No.831/2020-2021

Aizawl, the 5th May 2020 : Vawiin chawhnu dar 1 khan School Education Minister Pu Lalchhandama Ralte kaihhruaina in a Pisa-ah zirna kaihhnawih pawl hrang hrangten zirlaite hnena school fee lakdan chungchang ngaihtuahin an thukhawm.

He hunah hian School Education Minister Pu Lalchhandama Ralte chuan Mizoram mai nilo khawvel in ala hmelhriat ngailoh COVID-19 hripui leng avangin kan ram zirna pawhin harsatna lian tak a tawk chho a, kumdanga school tan hun pangngaiah zirna in pawh hawng theilo in kan awm ta hial a ni, a ti a. He hripui leng hian kan ram leh chhungkaw tin economy a khawih avangin kumdang a kan kaldan pangngai a kal remchan lohna tam tak a awm ta a. He kan harsatna tawh avang hian Mizoram chhunga zirna in zawng zawngte pawh inhriatthiamna thui tak nei a kal turin ka ngen che u ani, a ti.

School Education Minister Pu Lalchhandama Ralte chuan, COVID-19 vanga harsatna tawh chhungin school hrang hrangte pawh fee sang zawk la lo tur leh zirna in a fee chi hrang hrang lak thinte pawh ti tlem turin Mizoram chhunga zirna in hrang hrang neitute a ngen a ni.

Vawiin School Education Minister Chamber a meeting chuan hetiang hian kohhran leh private school zirna in hrang hrangte hnenah ngenna a siam nghal a ni.

1. Mizoram ah COVID-19 avanga Lockdown neih chhunga zirna in te hawn a theihloh chhung hi chuan zirlaite hnen atangin monthly fee 50% aia sang lakloh tur a ni.

2. Hun harsa kan tawnlai a nih avangin mi harsa school fee pe theilote chu ngaihnatthiamna pe turin leh a tul chuan fee awl thlenga an harsatna sutkian pui turin kohhran leh private school zawng zawngte ngen an ni.

3. Kum 2020 April thla chhung atana school fee a full a lo la tawhte pawhin May 2020 atan an siam rem ang.