No.830/2020-2021

Aizawl, the 5th May 2020 : Mizoram Science Centre hnuaia Innovation Hub in COVID-19 hripui leng mekah a hmatawnga thawktute hman tur plastic hmaikhuhna Protective Visor an siam chu vawiin khan Health & Family Welfare Minister Dr. R. Lalthangliana leh Home Minister Pu Lalchamliana te an hlan.

Health & Family Welfare Minister Dr. R. Lalthangliana chuan hetiang hmanrua Mizo pa ngei in a siamchhuak chu lawmawm tiin Commerce & Industries Minister a nih ang pawhin he thil hi fakawm a tih thu a sawi a. Mizo thil siam leh dehchhuah te hi a theih chin chinah kan ngaihsan leh hman uar a tul tih sawiin hripui hian engtia rei nge min tihbuai dawn a hriat lohva, chuvangin tualchhung thilsiam leh dehchhuah kawnga tan kan lak a pawimawh takzet a ni a ti a. COVID-19 dona kawngah hetiang hmanrua Mizoramin a siam chu Sawrkar Laipui a Ministry of Health & Family Welfare, Ministry of Development of North Eastern Region (DoNER) leh NEC hotute hriattir an nih tur thu a sawi bawk a ni.

Home Minister Pu Lalchamliana chuan Innovation Hub, Mizoram Science Centre tena hripui kan do mekah thawktute hmantur Protective Visor an siam chhuah bakah a thlawna Home Department hman tura an pe chu lawmawm a tih thu a sawi a ni.

Dr. R.K. Lallianthanga, Chief Scientific Officer, Directorate of Science & Technology leh Member Secretary Mizoram Science Centre ni bawk chuan Minister pahnih te hi an Department chan – Health & Family Welfare leh Home a hri pui dona kawnga a hmatawnga thawktu hman atan Visor 12 ve ve an hlan a. Dr. R.K. Lallianthanga chuan a tul ang zelin Visor hi an siam belh thei a mahse an khawl hi thil tam siam atan duan anih loh vangin ni khatah 3 vel an siam theih thu a sawi a ni.

Innovation Hub, Mizoram Science Centre chuan COVID-10 do naa, a hmatawnga thawktute hman atan Protective Visor frame atan hian Polylactic Acid Filament(PLA), plastic dang ang lova tawihral thei an hmang a. A frame hi 3D Printer hmanga an duan chhuah niin a Visor atan Overhead Projector (OHP) sheet an hmang a ni.