No.101/2020-2021

Mizoram State Rural Livelihoods Mission (MzSRLM) hnuaia block hrang hrang Serchhip, East Lungdar, Thingdawl, Bilkhawthlir, Khawzawl, Khawbung, Reiek, West Phaileng, Lawngtlai, Chawngte, Siaha leh Tipa R.D Block huam chhunga Village Organization (VO) leh Self Help Group (SHG) member te chu tunlai hian Covid-19 dona atan an pen chhuak a. Khaw hrang hranga VO leh SHG member ten an sumkhawl atanga sum an thawhkhawm chu khawchhunga Village Level Task Force (VLTF) te hnenah an hlan a. VLTF hnena an sum pekchhuah hi Rs 1,09,300 lai a tling tawh a ni. East Lungdar block hnuaia SHG member te pawh VLTF puiin an duty thin bawk.

SHG member zinga puanthui thiamten Covid-19 laka invenna atana mamawh hmaituamna (mask) leh Personal Protective Equipment (PPE) te an thui bawk a, Heng mask leh PPE an thuite hi a tul anga hman turin Deputy Commissioner leh BDO te hnenah hlan a ni. SHG member ten mipui mamawh chhawk zangkhai turin thui chhunzawm zel an la tum bawk.

Heng bakah hian Dulte khuaa Women SHG te chuan CIF loan an puk atanga aloe vera sahbawn an siamchhuah chu Covid-19 do na kawnga sawrkar hmalakna an thlawpzia lantir nan VLTF leh khawchhunga chhungkua 206 hnenah a thlawnin an sem chhuak bawk. Covid-19 vanga lockdown chhungin mipuiten awlsam zawka sum mamawh an lakchhuah theihnan MzSRLM hnuaia Business Correspondent (BC) Agent ten theihtawp an chhuah a. VLTF te duty na hnuaiah inhawngin Leng khua, Lungchhuan leh Farkawn khaw mipuiin sum lakchhuah nan an hmang tangkai hle a ni.

MzSRLM hnuaia SHG member ten CIF loan hmanga motor an lei Aajeevika Grameen Express Yojana (AGEY) pawh Serchhip, East Lungdar, West Phaileng, Siaha, Tipa R.D block huam chhunga mipui ten lockdown neih chhungin tangkai takin an hmang a. AGEY motor te hi mipui mamawh bungraw lakkhawm nan te, tuiphurhna atan leh VLTF duty phurhkual nan tangkai tak a hman a ni.