No.3351/2019-2020  

Nimin March ni 26, 2020 khan Law  Minister, Pu TJ Lalnuntluanga chuan a bial chhung 24-Champhai South (A/C) huamchhunga Covid-19 dona atana thawktu Village  Level Task Force-te hnenah kut tihthianghlimna (Hand Sanitizer) leh tangka fai Rs 2,35,000/- a hlan.

Tanpuina thilpekte hi veng/khaw len dan a zira sem a ni a,  March thla laihawl vel khan Minister hian a MLA Fund hmangin Covid-19 dona atana a tul ang anga hman turin District Level Task Force on Covid-19, Champhai hnenah cheng nuai 1 a lo hlan tawh bawk a ni. 

Law Minister chuan Covid-19 dona kawnga theihtawp chhuaha hma latu  District Level Task Force  leh Village Level Task Force-te, damdawi lama mithiam leh tlawmngai pawl hrang hrangte, Sipai, Police leh Media-te  inpekna chu  fakawm  tiin, a thim a var thlu lova ram leh hnam tana an inpekna chu chhuanawm a tih thu a sawi a.  Tun hi hnam anga kan tanrual hun leh tihtak zeta  Pathian kan auhna tur hun a ni a,  kan tanrualna leh theihtawp chhuahna te,   thinlung zawng zawnga  Pathian kan auhna te avangin he hri hlauhawm tak lakah hian chhanhimin kan awm ngei ang tih ka beisei a ni,  a ti a. Hri hlauhawm dona atana thawktu zawng zawngte  tha taka thlawpa an tana  chawl lova tawngtaipui thin turin mipuite a chah nghal bawk. 

Law Minister Pu TJ Lalnuntluanga hmalakna kaltlangin vawiin khan 24-Champhai South A/C huam chhunga Village Level Task Force-te tan   hmaituamna (Surgical mask)  sem chhuak a ni  bawk.