No.6626/2020-2021

Vawiin chawhnu khan SAD Conference Hall, MINECO-ah Health Minister Dr. R. Lalthangliana hovin Mizoram sawrkarin COVID-19 dona kawnga hma a lak chhunzawm zel dan tur sawiho a ni a, he hunah hian Medical Operational Team Chairman Dr. ZR Thiamsanga, MLA, Chief Secretary Pu Lalnunmawia Chuaungo, Finance Commissioner Pu Vanlalchhuanga, bakah Home, Health leh DM&R official te an tel a. Mizoram Kohhran Hruaitute Committee (MKHC), Jt. NGO Coordination Committee leh Indian Medical Association aiawhte an tel.

Meetingah hian COVID-19 veite enkawlna hmun CCC/DCHC leh DCH atanga chhuahtir (discharge) an nihin, an chhuah rualin an hawna tur veng Local/Village Level Task Force te hriattir thin nise, hei hian in lama self-monitoring an tihna tur atan atangkai dawn a ni, an ti a. COVID-19 test hi a tam thei ang ber tih a nih theihn nan testing centre a tam thei ang ber siam a, testing fee pawh mipui tana phurrit ni lo tura bithliah ni se ti a rawtna awm leh mahni inringhlel zingah CCC a awm hreh si, in lama home isolation tihna nei remchang si lo bawk si avanga in test hreh te tana ruahmanna tha siam tura rawtna chu ngun taka sawiho a nih hnu ah Medical Operational Team Chairman Dr. ZR Thiamsanga kaihhruaiin a zirchiang tur bik an in ruat a, a rang thei ang bera an rawtna te thehlut turin an ti a ni.

Chhiatni/Thatni inkaihhruaina chungchangah khauh zawka kalpui a nih dan tur sawiho niin, YMA leh kohhrante nen nasa lehzuala tan lak a tula hriat a ni a, Jt. NGO Coordination Committee te nen pawh a tul anga hmalak dan tur kawnga ke pen ho tha tih a ni. Sample test a pawimawhzia mipuite hnenah uar zawka inzirtir a tul thu leh COVID-19 kaihhnawih dan chi hrang hrang leh zawm tur chi hrang hrang sawrkarin a duan chu mipuite leh Task Force te hnenah uar zawka inzirtir ni se an ti a, tunhnaia positive thar zingah bazarah mutia hnathawk leh thingtlang kilkhawr zawk a mi an awm thu tarlan niin, mitin fimkhur lehzual turin an chah a ni.

Mizoram Police ten Minzoram ramri (international border) entry point hrang hrang 60 ah an duty mek thu tarlan a ni a, hei bakah hian Mizoram chhung hmun hrang hrang 384 ah an duty bawk a, Quarantine Centre hrang hrangah police 171 an duty mek a, contact tracing team ah police 15 an tel bawk a ni. Mizoram chhunga COVID-19 darh tur venna kawnga police duty zat hi 941 an ni. Mizoram Police mi leh sa zingah positive 124 an awm tawh a ni.

Aizawl Civil Hospital-ah COVID-19 positive te phur turin Ambulance 3 leh driver 3 an awm a, anni hian thla 5 chhungin positive 1736 an phur tawh a, chhunzan zawma tlaivar thaka an thawh thin thu tarlan niin, an inchhawk zangkhai theihnan sawrkarin volunteer driver 1 rawih belh a phalsak thu tarlan a ni bawk.