No.1720/2021-2022

Aizawl, the 6^th August 2021: Vawiin chawhnu khan Covid-19 hrileng dona atana sawrkar hmalakna, tuna kan dinhmun dik tak leh hmalak zel dan tur chungchangah Dy CM Tawnluia kaihruaina hnuaiah Sawrkar hotulian te leh Political Party hrang hrang aiawhte chuan sawiho leh inrawnkhawmna an nei a. He inrawn khawmnaah hian tuna Mizoram dinhmun enin Total Lockdown chu kalpui zel a tul tih chiang hle mahse eizawnna ten nasa taka a tawrh tawh avangin pawhsei chhunzawm chu thil harsaah ngaih a ni a. Total Lockdown hlih nghal tawp erawh thil tih chi a nih loh a vangin fimkhurna uar zawka kalpui chunga sumdawnnate kalpui a, hnathawk thei sia inkaihhruaina khauh tak siam rawt a ni. 

Inrawnkhawmna kaihruaitu Dy CM Pu Tawnluia chuan tuna harsatna liantham pahnih – Ramri buaina leh Covid-19 Hrileng Dona chungchangah mipuite, kohhran hruaitute, tlawmngai pawlte, political party hrang hrang ten sawrkar an thlawp zia leh sawrkar hnungah an din tlat a vangin lawm thu a sawi hmasa a. “He harsatnate te hian Hnam angin harh tharna min pe mek a; kan tanrual phawt chuan engmah kan tan hneh theih loh a awm lo a ni”, a ti. Hrileng thawhkhatna atanga Thawhhnihna kal meka Sawrkarin hma alak dan, Mizoram dinhmun te leh hmachhawp te Sawrkar thuneitute lam atangin ngaithlak hmasak a ni a. He hunah hian Health Minister Dr R. Lalthangliana, Dr ZR Thiamsanga, Chairman, Covid-19 Medical Operational Team (MOT), Chief Secretary Pu Lalnunmawia Chuaungo, Chairman, State Executive Committee ni bawk, Dr Pachuau Malsawma, SNO, IDSP, Dr T. Lalhmangaihi, Director, H&ME leh  Dr John Zohmingthanga, Director, ZMC ten Covid-19 dona kawnga sawrkar hmalakna te leh tuna kan dinhmun te an sawi a ni. 

Health Minister Dr R.Lalthangliana chuan tunah hian Mizoramah Covid-19 hrileng Thawhhnihna(Second Wave)  chu  kumin April thla atang khan a leng mek a; he hrileng( Virus) hi Thawhkhatna( March/June 2020 – March 2021) a Virus nen a inang tawh lova tuna mi hi nasa takin inkai a awl a, a hlauhawm zawk tih a sawi a. “Nikum lamah khan Covid-19 hrileng thawhkhatna-ah khan Mizoram chhungah hrivei mi 5000 awm ta se tiin lo chhut lawkna neih a ni a, Mizoram Health Care facilities te siam belh leh a thawktute theih ang tawka tam lakbelh pawhin a enkawl seng dawn lo a ni tih te hriat lawk a ni tawh a. Chutiang harsatna a thlenlohna turin theih tawp tak meuh chhuah a ni a. Mahse, Second Wave a hrileng mekte inkai a awlsam em avangin Kumin April thla atang khan nikhat thil thuah hrivei sang chuang te hmuh a ni ta a, kan inpuahchah lawk na zawng zawng pawhin a dawl zo ngang tawh lo a ni”,  a ti a. Tun Hrileng Thawhnihnaah  hian Hrivei mek dam lo 13,094 teh meuh mai kan enkawl mek tih a sawi a. Doctor leh Nurse te indaihloh dan leh damdawiin pawnlamah hriveite enkawlna hmunhma ten a dawl theih thlawt tawh loh avangin fimkhur leh zual sauh a ngai a. Dinhmun duhawm lo takah kan din lohna turin “Total Lockdown chu chhunzawm a tul tih chiang viau mahse eizawnna ten nasa taka a tawrh bawk si avangin inkaihhruaina( SOP) khauh zawk nena khawsakho te, hrileng laka himna tura kan tihtur - Covid-19 Appropriate Behaviour(CAB) te kan zawm uluk leh zual a ngai dawn a ni a ti. Hetih rual hian Dr. R.Lalthangliana chuan hrileng dona atana Vaccine pawimawhna te sawiin chak takin Hridanna chu kalpui chhunzawm zel a ni dawn tih a sawi bawk a ni. Health Minister Dr R.Lalthangliana tarlan dan chuan First Wave( March 2020 – March 2021) a hrivei punchhoh dan chu-: March20  - 1, April20 – May20 -  0, June20  - 159, July20  -  253, August20  - 599, September20 - 1006, October20 - 740, November20  - 1089, December20 -  369, January21 -  156, February21 –  51, March21 – 53 a ni a. Second Wave(April 2021 – ) a hrivei punchhoh dan chu April21 – 1655, May21 – 6268, June21 – 8093, July21 -18433, August21 upto 5.08.2021 – 3884. Second Wave a hrivei pun chak zia hi Health Minister chuan sawiin inkai a awlsam hle tih a langa, chhuah huk hi kan tan a la tih chi loh hrim hrim tih sawiin Total Lockdown hlih nghal tawp chu thil tih chi a ni lo a. CAB leh SOP khirh zawk nena kan hnathawh kan zir a, mitin ten fimkhurna mahni mawh kan lak theuh a ngai a ni a ti. 

Dr ZR Thiamsanga,MLA Chairman, Covid-19 Medical Operational Team (MOT) chuan Total Lockdown sawrkarin a lo puan tawh te chu huphurh tak leh loh theihloh thil a nih avanga puan a nih thin thu a sawi a. Total Lockdown kalpui mekah Mass Testing te neih theih a ni chu lawmawm a tih thu sawiin Hrileng darh zau zel tur venna kawngah hmalak dan tur ruahman nan te,  hrileng darh dan leh inkaichhawn dan hriatchhuahna atan te pawh a tangkai takzet a ni a ti. Dr Thiamsanga chuan contact tracing, mass testing leh interview na atanga data zirchian a nih thu a sawi a. Heng zirchianna atang hian CAB zawm tha vengah te hrileng inkaidarh huk a awm lo a; tunhnaia Tlangnuam leh Thakthing Mass testing atang te khan a chiang em em a ni a ti a. Chutih lain CAB zawm tha lo – colony leh building chhawnga chengho inlen pawh, inkawmho, chaweikhawm leh intlawhpawh te chuan an inkaidarh ngei ngei tih a lang chiang hle a. Zirchianna atanga thil pawimawh tak lang leh chu Vaccine lak a pawimawh hle a. Hrivei zingah Vaccine la tawhte chu an dam awlsam bik a, an hrivei pawh an tuar nep a, hrivei zinga vanduaina tawka nunna chanta zingah  vaccine la lo an tam hle tih a tarlang bawk a ni.

Health Department hotute leh ZMC hotute lam atangin Vaccine kalpui mek leh hmachhawp te, Covid-19 hriveite enkawlna tura bungraw chah mek kalkawnga thang mek leh thil tih tul te ngaihthlak a ni leh a. Hengah te hian sawrkarin hmalak chhunzawm dan tur te uluk takin sawiho a ni leh bawk a ni. Report a tarlan dan chuan 16.01.201 atanga Hridanna kalpui mek zelah 5.08.2021 thleng khan mi 6,33,58 ten First Dose an la tawh a. Complete Dose(First Dose leh Second Dose) la zo tawh mi 2,01,739 an ni a. Vaccine la tawh hrim hrim hi mi 8,35,267/- an ni. Nimin(05.08.21) Update in a tarlan dan chuan Aizawl District-ah hrivei 10097 awm mekin hrivei tamna ber district a ni a, hetih lai hian Hnathial District-ah hrivei an awm lo a, Khawzawl-ah hrivei 2 chiah awm bawkin Mizoram pumah hrivei mek  13094 an awm mek a ni.

Sawrkar lam atanga Hrileng dona kawnga sawrkar hmalakna te ngaihthlak a nih hnuah Dy CM Pu Tawnluia chuan Political Party hruaitute chu Sawrkar hmalakna kal mek chungchangah rawtna te siam a, a fuhlo lai nia an hriat te sawi turin a sawm a. He hunah hian ZPM, INC, BJP, ZNP, PC leh MNF party hruaituten thu an sawi a. Political party hrang hrang aiawh te chuan Hrileng dona kawnga sawrkar hmalakna chu fakawm an tih thu sawiin sawrkar hmalakna te an thlawp tlat tih an sawi a. Rawtna thenkhatte thehlutin Total Lockdown hlih chu a hun lo nia an hriat thu te, sumdawnna, ei leh bar zawn kawngah te Total Lockdown avanga harsatna nasa tak a awm mek avangin Total Lockdown anga inkhuahkhirh bur erawh a theih tawh lo nia an hriat thu an sawi a. Chutih rualin Total Lockdown thiah nghal tawp chu a him loah ngaiin sawrkar chu CAB tha taka zawm a nih theih nan dan bawhchhiate hremna khauh zawk siam a, inkaihhruaina khirh zawk te buatsaih tur leh hrileng darh na hmunah te Micro-Containment zone te siam chhunzawm turin an duh a ni. 

Vawiina inrawnkhawmnaah hian Home Minister Pu Lalchamliana, School Education Minister Pu Lalchhandama Ralte leh DIPR Minister Pu Lalruatkima te pawn thu sawina hun an hmang a. Pu Vanlalngaihsaka, Secretary, Home, Pu R.Lalramnghaka, Secretary, Health & Family Welfare te pawh meeting-ah hian an tel a ni.