No.3333/2019-2020

Mizorama Covid-19 vei damlo enkawltuten an mamawh em em, an invenhimna tur thuam, Personal Protective Equipment (PPE) set 11000, N-95 mask 10,000 leh shoe cover 9000  chu vawiin chawhnu dar 1:20 khan Lengpui Airport a lo thleng fel ta.

Tarlan tawh angin New Delhi atanga Mizoram rawn phur thleng turin state sawrkar chuan Air India Cargo Airbus -319 thlawhna a hire a. Heng bungraw lo thleng te hi a vaiin kg 1797 a rit a ni a, bawm 138 ah fun hran a ni. 

Heng bakah hian Guwahati atangin PPE kit 400, Hand Sanitizer liter 1000, cap- 1000, shoe cover - 1000, non woven material - 700, surgical gown -179 chu lirthei hmanga phurh niin kalkawngah a thang mek bawk a ni.

Thlawhna thlawh theih loh lai a ni a, Chief Minister hmalakna leh Home Ministry a zuk nawrna avangin North East State zingah thlawhna chang hmasa ber kan ni. Andhra Pradesh nen Consignment kan inṭawm a. Hetih lai hian Sikkim, Arunachal Pradesh, Nagaland, Manipur, Meghalaya leh Assam ten an consignment an la phur lut ve lo.

PPE kan neih thuai theihna tura Chief Minister hmalakna leh Covid-19 dona tura Health Minister hmalakna zarah PPE Kits leh equipment pawimawh dang engemawzatin Mizoram a lo thleng thei a. Sorkarin theihtawp a chhuah avangin Covid-19 vei enkawltu, Doctor leh Nurse te inthuamna tur leh thawktu dangte invenna tur changtlung zawk kan neih belh ta a ni.