No.1716/2020-2021

Aizawl, the 5th June 2020 : Vawiin khan Health & Family Welfare Department chuan COVID-19 hrileng dona tura Health & Family Welfare Department in hmanraw chi hrang hrang a lei khawm leh a dawn khawm te mumal leh awmze nei zawk leh daihzai thei ang bera sem chhuah a nih theih nan COVID-19 Equipments/Material enkawl leh sem chhuah dan tur kaihhruaina a hnuaia tarlan angin an duang.

He kaihhruaina hi 15.04.2020 (Wednesday) 1:00 P.M a Minister, Health & Family Welfare Department ho a Health & Family Welfare Department Officers te meeting thutlukna bawhzuia siam a ni a, thu leh awm hma chuan COVID-19 Equipments /Material sem chhuah chungchangah zawm tur a ni e.

Corona Virus hripui leng mek avangin Khawvel pumah mihring nunna tam tak hloh mek a ni a. He hri leng darh zel tur ven nan hian mi tupawhin mawhphurhna kan neih chu kut silfai uar te, hmai kawr (Face Mask) vuah te leh mipui zinga awm lai a in hnaihchilh loh (Metre hnih tal) te a ni. Heng bakah hian khawikipa thawk, Health Care Worker te'n he hri leng laka an him nan, an hnathawhna hmunah hmanraw chi hrang hrang an hman ngei a pawimawh a ni. Chuvangin a hnuaia ami angin kaihhruaina siam a ni.

1. Covid-19 hri leng laka invenna leh a kaihhnawih damdawi etc. leh hmanraw chi hrang hrangte chu State Covid-19 Store room, Directorate of Health Services, Dinthar, Aizawl, Mizoramah he hri a len chhung chu enkawl a ni ang. Heng te hi a hnuaia kan rawn tarlan te bak hmun dang leh general public a pek theih a ni lo.

2. Chief Medical Officer ten an bial chhung a Health Care Worker te leh he hri venna a thawktu dangte mamawh an pe chhuak thin ang. District chhunga facility ah englai pawhin Buffer Stock a awm theih nan a tul angin State Covid-19 Store atangin an mamawh tur an la khawm tur a ni ang. Stock Register up to date leh a pek chhuah dah record fel takin an vawng tur a ni.

3. Chief Medical Officer in Covid-19 laka invenna hmanrua a kawlte atangin Covid Care Centre (CCC), Designated Covid Health Centre (DCPIC), Designated Covid Hospital (DCH), Facility Quarantine Centre te, Screening point te Health Care/Facility te leh thawktu dangte mamawh chi hrang hrang a pe chhuak ang. Hemi a tan hian distribution plan siam in chumi mil chuan a sem chhuak zel ang.

4. District Hospital in Covid-19 invenna hmanrua an dawn bak mamawh anneih belh chuan CMO hnen atangin an dil thin ang. An hmanna record fel takin a vawng tur a ni.

5. District chhunga Health Care facility hrang hrang te Sub District Hospital (SDH), Community Health Centre (CHC), Primary Health Centre (PHC), Sub Centre, Health Clinic, ASHA mobiliser, ASHA te chanpual theuh siam sak an ni a. An chanpual theuh an hman zawh chuan Chief Medical Officer hnen atangin an lam zel tur a ni ang.

6. District tina Sawrkar Department dang, e.g. Police Dept., Disaster Management & Rehabilitation Department, etc. te Covid-19 hrileng dona a hma la tute'n hmanrua mamawh an nei anih chuan an thawhna district chhung bialtu Chief Medical Officer hnenah an dil tur a ni ang.

7. Local Level Task Force, Village Level Task Force, Border Area Task Force duty ten Covid-19 hri laka invenna hmanrua an mamawhte a awm chuan an district chhung bialtu Chief Medical Officer hnenah an dil tur a ni ang. A pek chhuah dan record hi fel fai takin CMO hian a vawng tur a ni.

8. Invenna hmanrua an lakkhawm leh an pek chhuah nate fel fai tak leh endik dawl ngei turin lehkhabu-ah an chhinchhiah in an vawng tur a ni. (Stock Register Update).

9. District chhunga Health Care Facility zawng zawngten (eg. DH/SDH, CHC, PHC, S/C) Covid-19 laka invenna hmanrua an hmuh te, an hman ralte leh an kawl mek te nitin dar 11:00 A.M ral hma in Chief Medical Officer hnenah ziakin an hrilh hre thin tur a ni. Chief Medical Officer in an District pumpui Report chu, State Stock Management Unit ah dar 12:00 noon ral hma in a report tur a ni. State atangin Central lamah dar 1:00 P.M ral hmain State pumpui report chu IDSP portal-ah upload tur a ni.

10. District tin a invenna hmanrua balance awm leh State a Stock awm (balance) te a pe chhuak tu ten Stock Register-ah an ziak lut anga hmuh theih turin nitin an tar chhuak ziah tur a ni.