No.68/2021-2022

Aizawl, 9th april, 2021: 8.4.2021 zan dar 6:30 khan Prime Minister Pu Narendra Modi chuan COVID-19 hri leng chungchangah India state Chief Minister-te video conference kaltlangin a kawm a, he hripui second wave laka ram mipui an him zawk theih nan leh, kan do hneh theihna tura hmalak dan pawimawh a tih te a sawi a ni.

Prime Minister chuan chak zawk leh tam zawka hri kai chhui hna chu thawh a, a tam thei ang bera test tih pawimawh a tih thu a sawi a. Positive hmuhchhuah thar atanga darkar 72 chhungin a contact mi 30 tal chhuichhuak a, test a, a tul anga quarantine ni se a ti a. Hun rei tak he hrik hi lo hmachhawn tawh mah ila chauh avanga tha thlah dul thei kan la nilo, a ti. Covid avanga nunna chan an awm chuan thi te data chiang taka chhinchhiah a, he hri kan do na kawnga hri kai te enkawl zui zelna atan pawh a pawimawh tur thu a sawi bawk.

Prime Minister chuan mipuite a bo a bang awm lovin he hri donaah hian mawhphurhna kan nei vek a, theihtawp chhuah a kan fimkhur tlan a, sawrkar kaihhruaina siam te zawmin, 'covid appropriate behavior' te tha taka zawm chu a pawimawh tak zet a ni, a ti a. Vaccine pek chu chak zawk leh huap zau zawka kalpui ni se, a ti a. "Test, Track, Treat" chu he hri kan donaah tunah chuan kan dah len ber turte a ni, a ti. State hruaitute chu fimkhur tura inhrilhhriatna campaign pawh ngawrh zawka kalpui turin a chah bawk.

Mizoram Chief Minister Pu Zoramthanga pawhin he meeting hi chhimin, Health Minister Dr. R. Lalthangliana, Chief Secretary Pu Lalnunmawia Chuaungo, Addl. Chief Secretary Pu JC Ramthanga, Special Secretary for H&FW Department Pu R. Lalramnghaka, NHM Mission Director Dr. Eric Zomawia, Official Spokesperson & State Nodal Officer on COVID-19 Dr. Pachuau Malsawma leh H&FW thawktu pawimawh dangte'n an tawiawm a ni.