No.2939/2020-2020

Vawiin khan Higher & Technical Education Minister Dr. R.Lalthangliana hovin Higher & Technical Education Officers leh Government Colleges leh Institutions a Principal-ten Institute of Advanced Study in Education (IASE) Conference Hall-ah meeting an nei.

Minister Dr. R. Lalthangliana chuan thu sawiin, Covid-19 hripui len lai ni mah se, zirna kal zel dantur ngaihtuah chu ram tan thil pawimawh tak a ni, a ti a. Social Distancing vawng chunga IASE Conference Hall-a meeting buatsaih a ni chu lawmawm a ti bawk a ni.

Minister chuan khawvel huapa sawi chuan Covid-19 chungchangah ram tin dinhmun a tha teh chiam lo a, India ram chu Covid-19 vei tamna ber zingah tel chho in, India ram state hrang hrangah nitin Covid-19 kai hmuhchhuah belh zel a ni a, Mizoram-ah ngei pawh damchhuak vei tawhlo tam tak awm mahse, vei hmuh belh zel a ni, a ti a.

Minister Dr. R.Lalthangliana chuan Aizawl khawpuia Sawrkar college hrang hrangah kumtin First Semester Admission a lun em em ta vek mai a, Aizawl khawchhunga college nilo, district danga college-ah te pawh hian engtinnge admission kan tihpun theih ang tih hi vawiina kan inkohkhawm chhan ber chu a ni, a ti a. Minister chuan Covid-19 hrileng hian Mizoram zirna huang chhungah danglamna tha tak siam se, rahbi thar min kai tirtu ni zawk se; College Course pangngai bakah Skill Development Course hi Mizoram College hrang hrangah introduce theih a ni em, teaching faculty leh man power bakah tuna awmsa building-ah hian class room a awm thei ang em tihte lo ngaihven leh hetiang lama ngaihtuahna pawh tun atanga seng turin Meeting a kalkhawm te a sawm a, Minister chuan Skill Development Course College ah bul tan theih a nih chuan Aizawl College chauh nilo, district danga college-ah pawh eizawnna nei nghal duh zirlai tam takin admission an zawn a, admission pawh kum zawka kalpui a nih theih a rin thu a sawi bawk a ni. H&TE Minister chuan College tinte tan decentralization of power hmangin mahni college bus driver hlawh tur leh hostel cook rawihna tur te chu sawrkar remtihnain College tinte thuneihna pek dan kan ngaihtuah ang, tiin a sawi bawk a ni.

Dr. R. Lalthangliana chuan Mizoram hi RUSA hmang tangkai ber state kan ni a, India ram pumah RUSA Zirtirtu 200 pawh tling lo ah Mizoram in 72 a chang a, 69 in an zawm fel tawh a ni, a ti a. RUSA 1 leh RUSA 2 kal pui tawh niin, kan thatpui dawn lai takin Sawrkar laipuiin tih tawp a tum a, theihtawp chhuah in Union Ministry-ah Mizoram sawrkarin ti tawp loh turin ngenna a zuk thlen a, cheng vaibelchhe 9 Mizoram tan a rawn dah hlawl mai a, heihi Mizoram college hrang hrang tan malsawmna a ni, a ti a. Hei bakah hian Mizoram Scholarship Board mamawh cheng vaibelchhe sawmthum leh pahnih tun lockdown hunah a rawn pe bawk a ni, tiin a sawi. Minister chuan Mizoram University Southern Campus tur pawh, SEDP hnuaia Higher & Technical Education Board Vice-Chairman leh Lunglei North Bialtu MLA ni bawk Dr. Vanlaltanpuia bial chhunga din thei turin hmalak a ni a, tunkum January ni 11 khan order copy hmuh a ni, tiin a sawi.

Government College Principal te hian Lockdown chhunga zirna an kalpui dan hrang hrang report an pe a. Zoom app, Whatsapp leh Google Class hmangin semester khat chhunga zirzawh tur ang ang te zir a nih theih nan, Online class lak thin a nih bakah pdf files te pawh inpek a nih thu an sawi a. District thenkhatah chuan internet service provider a that tawkloh avangin leh zirlaiten smart phone an neihloh avangin online class lak a harsatna thu te an sawi bawk a. RUSA hnuaia college sum hmuhdan te ngaihthlak a nih bakah, lockdown laia hnathawh kalpui mek dan te ngaihthlak a ni bawk a ni.

Higher & Technical Education Board Vice Chairman Dr. Vanlaltanpuia pawh in thu sawiin Graduate nih bakah eizawnna nei tura thiam bik (skills) neih chu ram economy tan a pawimawh a, mi zawng zawngin Sawrkar hna an thawk vek theilo a, hnathawk thei (man power) Mizoram-in a ngah a, mahni a intodelh thalai, eizawnna nei a tam zawk an nih hunah ramin hma a sawn dawn a ni, tiin a sawi.

Minister Dr. R.Lalthangliana leh Higher & Technical Education Board Vice Chairman Dr. Vanlaltanpuia te hian principal 12 te hnenah lawmpuina certificate an hlan nghal a ni.

Meeting hi Higher & Technical Department Additional Secretary Pu Lalrinsanga'n a kaihruai a. Government College Principal 26 zingah 25 in meeting hi kalin, Higher & Technical Department Director Pi K. Lalrinzuali, Joint Director (Admin) Pu Lalhmingthanga, Joint Director (QAC) Pu R. Lallianzuala leh midangte an tel a ni.