No.2940/2020-2020

Dated Champhai, the 10th July, 2020: Vawiin chawhnu khan Health & Family Welfare Secretary Pu H.Lalengmawia hovin Champhai DC Conference Hall-ah DLTF Member leh sawm bik te’n meeting an nei. Meeting-ah hian tunlai hripui leng mek chungchanga sawrkar leh khawtlang hmalaknate thlirho niin, Health Sector lama sawrkar hmalakna leh hmachhawpte tarlan a ni.

Health Secretary Pu H.Lalengmawia chuan Covid-19 dona kawnga Champhai district hmalakna chu chhuanawm a tih thu sawiin, hemi kawnga DLTF, VLTF, Police, NGO, Kohhran leh Media te thawhhona chu fakawm a ti a. Champhai district chu ramri thui tak ven tur nei anihna laiah theihtawp chhuaha phunnawina leh lungawilohna thawm awm lova mawhphurhnate hlenchhuah ani thin chuan an ze puitlin zia a entir a ni tiin, hotu lu ber DC leh SP fel leh viak tha tak leh thawktu dang an nei chu vannei a tih thu a sawi bawk.

Pu H.Lalengmawia chuan Covid-19 hripui doletna tura hmalakna enfiaha lokal anih thu sawiin, Covid-19 doletna kawngah State sawrkarin theihtawp a chhuaha, hripui lo thlen hma atang tawhin rang taka chet lak nghal vat a ni a, hmanraw hrang hrangte inchuhna karah rang taka ngaihtuah nghal zung zung niin, Thlawhtheihna hialte charter-a phurh thlen anih thu a sawi a. Covid-19 thlentu virus chu ze inthlak nasa tak tun thlenga mithiamte zir bing anih thu pawh sawiin, Test na khawl tha tak Mizoram ngeia din anih ve ngei theihna turin hmalak nghal niin, mithiamte rawna hmanruate lakhawmin kar hnih chhunga RT-PCR Test kalpui hman anih thu a sawi a. Tunhnaiah hmasawnna hrang hrang hmuh anih thu leh RT-PCR leh a tanpuitu khawl dang tangkawpte nen Sample test chak taka kalpui a ni a, quarantine centre-a awm ten an awm chhungin sample result an hre hman vek tawh a ni, a ti a. Indian Council of Medical Research (ICMR) inkaihhruaina ngaipawimawh chung zelin sawrkarin hma a lak thu leh district tinah mithiamte tirin, an thurawn zulzuiin Truenat Quattro RT-PCR dah vek tum a ni a, he khawl hmang hian Covid-19 mai nilo test hrang hrangte endik tum a ni, a ti a. Covid-19 dona kawnga sum leh pai mamawhte sawrkarin phal takin a pek zel thu sawiin, ICMR atanga Rapid Antigen Test Kid a thlawna dawn 15000 zinga 1000 chu Champhai district tan pek anih tur thu a sawi a. Covid-19 hripui laka Mizoram dinhmun tlangpui pawh tarlangin, Pu H.Lalengmawia chuan kan zavai thahrui, thiamna leh hriatna vanga tumah nunna chan lo leh a veite pawh ngaihtuahawm lutuk awm lova awm kan ni tiin, Quarantine Facilities indaihlohna hriaa Kohhran ho an lo penchhuah avangin lawmthu a sawi bawk.

Health Secretary chuan sawrkarin Health sector tih hmasawn kawngah Covid-19 thlen hma atang tawhin theihtawp chhuaha hma a lak tan tawh thu pawh tarlangin, thawktu, thawhna hmun leh hmanraw mamawh ang angte pawh a theih anga buaipui anih thu a sawi a. Zemabawk Cancer enkawlna hmuna hman tur Cancer hemna khawl vaibelchhe 11 chuang man leia bun mai thei tura ruahman anih thu sawiin, Cancer timur tak bitum thei tur Linear Accelerator cheng vaibelchhe 14 man pawh chah thlen anih tawh thu a sawi a, Cancer chungchangah Japan sawrkar nen cheng vaibelchhe 500 hu DPR siama thawhdunna tur duan anih thu a sawi bawk. Sub Centre-te tichangtlunga Health and Wellness Centre-a hlankai vek tum anih thu pawh sawiin, ABPMJY Golden Card cheng nuai nga thleng bill theihna in a huam ve loh natna thlenga huapzo tur Mizoram State Health Care Scheme changtlung zawk nuai 2 thleng bill theihna siam anih thu leh a pahniha kaihkawp theiha siam anih thu a sawi a. Doctor-te pension hun kum 62 thlenga pawhsei anih thu leh Health Sector tihchangtlungna turin Sawrkar, Ministry leh Company liante ram chhung leh pawn thlenga dawra hmalak anih thua tarlang a, Mizote zinga Doctor indaihlohna hriain Doctor zirna hmun Zoram Medical College (ZMC) tihchangtlung zel ani, a ti bawk.

Pu H.Lalengmawia chuan Champhai district chu district hmasawn, ngaihtuahna danglam leh tha tak midangte tana phochhuah tum tur leh kawng engkima entawntlak nih tum zel tura chahin duhsakna a hlan a ni.

Champhai Bawrhsap Pi Maria C.T Zuali chuan hun chep tak kara Champhai rawn tlawha hmalaknate rawn hmuhpuitu Health Secretary chungah lawmthu sawiin, Champhai district-ah Official, VC, NGO leh Media-te inkara thawhhona tha tak a awm thu a sawi a. Covid-19 mai bakah tunhnai lirnghing vanga harsatna district in a tawhte a tul anga chhawmdawla ngaihven zel a nih thu a sawi bawk.

Vawiin thutkhawmah hian Health Secretary leh Bawrhsap bakah hian Pu Rex Zarzoliana Vanchhawng SP, Pu Mark Lalthanliana, Addl DC, Pu Lalsawma Pachuau, Joint Director (F&D), Dr Vanlalrengpuia, State Programme Manager NHM, DLTF Member-te, Assam Rifles leh GREF hotute, VC, YMA, MUP, MHIP, MJA leh Kohhran hruaitu theuhte an tel a ni.