No.7444/2020-2021

Vawiin chawhnu khan SAD Conference Hall, MINECO ah COVID-19 hrileng mek kara Mizoram dinhmun thlirho a ni a, he hun hi Health & Family Welfare Minister Dr. R. Lalthangliana'n kaihruaiin, Home Minister Pu Lalchamliana, MOT Chairman Dr. ZR Thiamsanga, MLA, Chief Secretary Pu Lalnunmawia Chuaungo bakah COVID-19 dona kawnga hmalatu department hrang hrang hotute,  Mizoram University hotute, Indian Medical Association (IMA) leh Mizoram Kohhran Hruaitute Committee (MKHC) aiawhte an tel.

Vawiin thlirhona hunah hian COVID-19 hrileng mek kara School Education department dinhmun, hmalakna leh beiseinate report ngaihthlak a nih bakah Mizoram University leh Higher & Technical Education department atanga rawtna te ngaihthlak a ni a. Mizoram University leh School Education department hnuaia zirna course hrang hrangte chhunzawm leh hun tura rawtna awmte sawiho a nih hnu in Indian Medical Association (IMA), Medical Operational Team (MOT) leh mithiam bikten uluk taka lo zirchiang a, an ngaihdante State Executive Committee on Disaster Management, Mizoram hnenah thlen se tih a ni.

Mizoram Kohhran Hruaitute Committee pawhin sawrkarin Sabbath  leh Pathianni a biak in hrang hranga inkhawm a phal ta chu lawmawm an tih thu sawiin, sawrkar dan siamte pawh uluk taka zawm an tum thu an sawi a, inkhawm chungchangah rawtna thar an neihte pawh sawilangin hengte hi Indian Medical Association (IMA), Medical Operational Team (MOT) leh mithiam bikten uluk taka lo zirchiang a, an ngaihdante State Executive Committee on Disaster Management, Mizoram hnenah thlen se tih a ni.

Meetingah hian nimin February ni 3, 2021 thleng khan Healthcare Workers 9995 (65%) hnenah COVID-19 vaccine "Covishield" pek an nih tawh thu tarlan a ni a. Mizoram chu India rama COVID-19 vaccine pek kawnga hma la tha State/UT tehnaah 5-na dinhmun an hauh mek thu tarlan a ni. Tarlan tawh angin Mizorama Healthcare Worker 17500 hnenah hri danna hi pek tum a ni a. Tun kar chhung hian dose khatna pek zawh vek beisei a ni.

Frontline Workers (Home department leh UD&PA) 27,000 chuang vaccine pek tur tihfel thawkhat tawh a ni a, hemi atan hian Covishield dose 30,400 dawn tawh a ni a, sawrkar Laipui thu leh hla ngaihchan mek a ni.

January, 2021 khan mizoramah COVID-19 positive 156 hmuh chhuah a ni a, February ni 1 - 3 inkarah mi 4 positive thar hmuhchhuah a ni bawk a. Mizorama positive hmuhchhuah tawh zawng zawng 4376 zingah kum 1-10 inkar 187, kum 11-20 inkar 592, kum 21-30 inkar 1337, kum 31-40 inkar 1110, kum 41-50 inkar 638, kum 51-60 inkar 380, kum 61-70 inkar 91 leh kum 70 chunglam mi 41 an ni a. Positive hmuhchhuah zinga 86% hian symptom an nei lova, symptom nei hi 14% an ni. Positive hmuhchhuah zawng zawng zinga 1819 hui Mizoram pawn mi leh sa an ni.