No.7443/2020-2021 

Vawiin khan DC Conference Hall, Lunglei ah Pu R. Vanrengpuia, Addl Deputy Commissioner, Lunglei kaihhruaina in Lunglei Sanitation Task Force thutkhawmna neih a ni. Meeting-ah hian Task Force member-te bakah Lunglei town area VC-te telin UD&PA Department buatsaih ‘Cleanliness Competition in Urban Mizoram - 2020’- a Lunglei khua in lawmman pahnih a dawn ‘Overall Cleanest Town’ leh ‘1^st Rank for District Headquarter’ te lawm dan tur an rel.

Sanitation Task Force Chairman Pu R.Vanrengpuia chuan Mizoram khawpui fai inelnaah Lunglei in lawmman sang ber pahnih a ruala dawng thei chu ropui a tih thu sawiin he dinhmun thleng thei tura rim taka thawka hun leh tha nasa tak seng tute Nodal Department UD&PA, khawtlang hruaitute, tlawmngai pawl hrang hrangte chungah lawmthu a sawi a. Faina kawngah Lunglei District mipuite kan harh thar zel chu lawmawm tiin zirtur leh hmasawn zelna tur tam tak pawh kanla nei ani tiin Lunglei District mipuite faina kawnga hmalak puiah a sawm a. Heng lawmman hlu tak kan dawn hi faina kawnga nasa zawka ke kan pen theihna tura rahbi pawimawh tak an ni tiin kalkhawmte chu tan la zual sauh turin a fuih a ni.

Member secretary Pu Andrew Lalhruaia, DUDO Lunglei chuan faina kawnga Lunglei hmalakna tlangpui a tarlang a.  Lunglei chu Open Defecation Free + (ODF+) dinhmun nei tura inpuahchah fel tawhin endiktute (inspection team) lo kal nghah mek a ni a. Lunglei khawpui chhung in tin atangin bawlhhawlh lak niin 100% door to door collection dinhmun kan nei mek a. Commercial area bikah te nodal department UD&PA chuan bawlhhawh bawm 600 chuang a hung chhuak a. Faina kawnga inzirtirna pawh ngawrh taka kalpui niin school, college, kohhran leh pawl hrang hrangah Awareness Campaign neih thin a ni a. Lunglei khawpui hmun lun lai 200 chuangah faina chungchang inzirtirna thuziak permanent hoarding tar chhuah a ni bawk. Hemi bakah hian faina kawngah Community Participation ngaih pawimawh niin mipui mimir, khawtlang hruaitute leh pawl hrang hrang te hmalak pui an ni a, Lunglei town area chhunga VC zawng zawng te VC Sanitation Committee din pui an ni a, faina hnatlang koh thin a ni. Lunglei khawpui leh a chhehvelah thing humhalh leh mass plantation kalpuina hmun Urban Forest pasarih (7) enkawl mek a ni bawk. Hemi bakah hian MUP Sanitation Volunteer te ruat niin kum tluana faina kawnga hmalakna Leitlangpui Faina Calendar te buatsaih a ni.

Meeting chuan faina kawnga Lunglei mipuite fuih tharna atan leh lawmthu sawina atan heng lawmman dawnte pual hian Lawmna Function neih ngei se tih a rel a. February 17^th – 19^th chhungin lawman hun hi hman ni se tih an rel a. Hemi pual hian Lunglei khawpui pumpuiah faina hnathlang koh ni se tih an rel bawk.

Hemi bakah hian bawlhhlawh sawngbawl chungchang leh tawih thei leh tawih theilo thliar hran chungchang te sawiho niin April ni 1, 2021 atangin bawlhhlawh thliar hran kawngah hmalak anih tur thu DUDO Lunglei Pu Andrew Lalhruaia chuan a sawi a ni.