No.4796/2020-2021 

Dated Champhai, the 6th September, 2020: Champhai Vengthlang YMA President Pu C. Laltanpuia (L) Kum-46 S/o C.Sualneka (L), Covid-19 hripui leng mai thei tur venga Indo-Myanmar ramri hrula  tlawmngaia rammu, a rammutna atanga Rannung seh (Scrub Typhus) natna veia vanduaithlak taka August Ni 12, 2020 a thi chhungte hnenah vawiin khan Sawrkarin Chief Minister's Relief Fund for COVID-19 kaltlangin  ralna sumfai Rs 1,00,000/ -, a nupui Pi H.Lalnuntluangi (Senpuii) hnenah a hlan.

Ralna puala hun tawi Pu C.Laltanpuia (L) chenna In Champhai Vengthlang Rahsi Venga buatsaihah Champhai Bawrhsap Pi Maria C.T Zuali chuan sawrkar aiawhin thu a sawi a. Sawrkar leh khawtlang tana mi inpe zo tak Pu C.Laltanpuia ral angai ta mai chu lungchhiatthlak a tih thu sawiin, khawtlang mamawhna zawnah leh tanpui ngai an awma  tanpui tura thawkchhuak vat thin mi anihna chuan a hming a put zawh tir hle a ni, a ti a. Pu C.Laltanpuia thihna chu  a kalsan tak a chhungte leh khawtlang tan mai bakah  Sawrkar ang pawhin Sawrkar hna a thawhnaah  channa nasa tak anih thu a sawi a.  Covid-19 hripui leng dona kawnga a hnathawh ropui tak chu Sawrkarin a hrereng tawh dawn a, khawtlang, ram leh sawrkar anga a hna thawhna zawng zawngte chu hriatreng a ni tawh ang,  a ti bawk.

Vawiin ralna hun hi Pu R.Lalnghakliana, Project Director, DRDA Champhai chuan a kaihruaia. Pu Lalnunfela Chawngthu, SDO Sadar-in hunserh hmangin ralna sumfai hi Pi Esther Leihang, DLAO chuan a hlan a ni. Chhungkaw aiawh leh he hun hmanpuitu Sub-Hqrs. YMA Champhai atangin thusawi tawi ngaihthlak  a ni bawk. Covid-19 martar  Pu C.Laltanpuia (1974-2020) hi Champhai Vengthlang Branch YMA President leh Sub-Hqrs. YMA (SYMA) Champhaia Executive Committee Member chelh lai a ni a, eizawnna lamah chuan Govt. G.M Higher Secondary School, Champhai Vengsanga Commerce Lecturer hna thawk a ni.