No.4797/2020-2021  

Vawiin chhun khan SAD Conference Hall, MINECO-ah Health & Family Welfare Minister Dr. R. Lalthangliana hovin inrawnkhawmna hun hman a ni a, he inrawnkhawmna ah hian Medical Operational Team on COVID-19 Chairman Dr. ZR Thiamsanga, MLA, Chief Secretary Pu Lalnunmawia Chuango, Health & Family Welfare Secretary, Home Secretary, IGP (L&O) leh Health & Family Welfare Department hotute an tel a, Central YMA, Mizoram Kohhran Hruaitu Committee (MKHC), Indian Medical Association (IMA) leh Mizoram Government Doctors' Association (MGDA) aiawhte an tel bawk a ni.

Vawiin inrawnkhawmna hunah hian COVID-19 veite an sample test a negative hma chuan anmahni enkawlna hmun CCC/DCHC/DCH atangin chhuahtir loh tur tih sawrkarin a kalpui lai mek hi hman chhunzawm zel tha tih a ni a. Mizoramah COVID-19 positive an pung zel a, CCC/DCHC/DCH ah te  indah sen loh hun a thleng a nih chuan mipui mar dek chung leh mipuite ngaihdan ngaichang chung zelin thutlukna siam nise tih a ni.

Health minister Dr. R. Lalthangliana chuan Ministry of Health & Family Welfare chhut danah kumin December thla hian COVID-19 positive 5000 chuang Mizoramah hmuhchhuah a ni tawh dawn a, tuna COVID-19 positive enkawl dam tawhte percentage anga chhutin mi 2000 bawr vel active case nei turah kan inngai a, Mizoram chhunga COVID-19 positive te enkawlna tur damdawiin kan neihsa te hian min dawl zo dawnlo niin a hriat a, kan hmalam hun hriat a ni lova, India ram pawh vawiin atang khawvela COVID-19 positive ngah ber dawttu niin Brazil kan lehpel tawh a, nimina sample test zingah mi 90,632 positive thar India ramah an awm a, Mizoramah 31 kan awm bawk a. Hetiang kan nih avang hian Contingency Plan siamin kan lo inruahman lawk tawh a, kan Chief minister pawhin kan ruahmannate min pawmsak tawh a ni, a ti a. CCC indaihlohna phuhru turin theihtawpa hmalak a nih thu leh YMA leh kohhranho tanpuina an la mamawh dawn chauh tih a sawi bawk.

CCC kan neih sa bakah tunhnaiah CCC atana hman tur 4 hmuh thar a nih thu tarlan a ni a, chungte chu - JNV School, Thingsulthliah (khum 318 awm theihna), Montford School, Melriat (khum 86 awm theihna), Gilead Special School, Bawngkawn, Aizawl (khum 53 awm theihna), SIRD Hostel, Thingsulthliah (khum 25 awm theihna). Veng leh Khaw thenkhatah CCC awm an remtih loh avanga harsatna awm thin pawh sawichhuah niin heng CCC te hi pawn lam mi tan a hlauhawmloh thu inhrilhfiah chian a tul tih tarlan niin, CCC indaihlohna phuhru tura hmalak kawngah MKHC leh CYMA pawhin an tangkai theihna zawnah theihtawp chhuah an inhuam thu an sawi a ni.

Zoram Medical College ah COVID-19 positive 63 enkawl mek an nih thu leh, ICU a enkawl ngai an awm tawh rih loh thu tarlan a ni.

MKHC leh CYMA hruaitute chuan Mizoram sawrkarin COVID-19 hrileng do kawnga hma a lak dan chu a fakawm a ni, tiin lawmthu an sawi a ni.