No.6315/2020-2021

Tunhnaia Mizoram chhunga COVID-19 hripui leng dinhmun thlira thutkhawm hmanhmawh (emergency meeting), vawiin chawhnu-a SAD Conference Hall, MINECO-a neih chuan mipuite hripui leng laka kan him zawkna tur a nih beiseiin karleh thawhtanni (October ni 26, 2020) atanga chhiara ni 14 chhung atan "COVID-19 No Tolerance Fortnight" neih ni se an ti.

Health & Family Welfare Minister Dr. R. Lalthangliana kaihhruai he thutkhawm hmanhmawhah hian COVID-19 dona kawnga hmalatu department hrang hrang report ngaihthlak a nih hnu ah, COVID-19 laka Mizoram dinhmun a derthawng lehzual nia hriat a nih avangin "COVID-19 No Tolerance Fortnight" neih ni se tih a ni a, hemi hun chhung hian COVID-19 dona atana sawrkar ruahmanna siam hrang hrang - Unlock guidelines, Standard Operating Procedure (mipuite zawm tur) hrang hrang leh The Mizoram Containment and Prevention of COVID-19 Ordinance, 2020 te chu khauh tak leh ngaihnathiamna tel lova kalpui a nih chuan khawtuala COVID-19 hri inkaichhawnna (transmission chain) hi chhutchah theih an inbeisei a. Chief Secretary kaihhruaina hnuaia awm State Executive Committee, Mizoram State Disaster Management Authority-in "COVID-19 No Tolerance Fortnight" kalpui dan tur kimchang an duang dawn a ni.

Vawiin thutkhawmah hian zirna in hawn leh chungchang bakah lirthei tlanchhuak tam lutuk chungchangte an sawiho a, hemi lama thuneitute nen a rang lama ngaihtuah nawn leh tha an ti a. District tin bawrhsap ten Health department official-te nen inrawn tlangin, Containment area/Zone puan a tul a nih chuan rang taka hmalak zel ni se an ti bawk.

Vawiin thutkhawmah hian tunhnai ni 5 chhung hian COVID-19 positive zirlai 13 leh zitirtu 1 hmuhchhuah tawh an nih thu tarlan a ni a, heng zinga 4 hi Hostel-a lut hman tawh niin, Hostel lut lo 4 an awm a. Tunhnai kar hnih chhunga positive hmuhchhuah zinga a tam zawk chu symptom nei (natna langchhuak) an nih thu tarlan a ni bawk. Aizawl Civil Hospital OPD ah pawh COVID-19 positive hmuhchhuah an awm thin avanga OPD khar thut thut a ngaih thin thu sawi niin, hemi avanga mipuiten harsatna an tawk thin chu Civil Hospital thuneitute chuan pawi an tih thu an sawi a, rang taka OPD an tihthianghlim nghal zung zung thin thu leh a him tawk nia an hriat veleh an hawn chhunzawm lehnghal thin thu an sawi a ni.

Health Minister chuan fimkhurna kawnga inthlahdah lo turin mipuite a chah nawn leh a, hun rei tak tha thlah lova sawrkar, kohhran, NGO, khawtlang hruaitute leh mipuite theihtawpchhuaha kan tan tlanna in rah tha a chhuah a, tun thlengin khawvel leh India ram hmun dang aiin kan ziaawm zawk niin a hriat a, he kan thawhrimna, tha leh zung bakah sum tam tak kan sen tawhna hi a thlawna a kal ral mai loh nan mitinten tan i la thar leh ang u, tiin mi zawng zawng a ngen a ni.

Vawiin thutkhawmah hian Medical Operational Team on COVID-19 Chairman Dr. ZR Thiamsanga, MLA, Chief Secretary Pu Lalnunmawia Chuaungo bakah Health, Home, DM&R, UD&PA, School education hotu pawimawhte an tel a, Mizoram Kohhran Hruaitu Committee (MKHC) leh Indian Medical Association (IMA) hotute an tel a ni.

Attachment

  • Loading attachment...