No.6314/2020-2021

Vawiin ni 21, October 2020 khan Mizoram Science, Technology & Innovation Council (MISTIC) leh Institute of Bioresources and Sustainable Development (IBSD) te tangkawp chuan Directorate of Science & Technology Conference Hall ah “Outreach and sensitization program on Bamboo Biosilica as additional source of income for bamboo shoot collectors in Mizoram” tih an buatsaih a. Hemi hunah hian Mau/rawtuai chhunga phut, ‘mau dal’ lakchhuah a hman tangkai dan zir hona neih a ni.

Prof. F.Lalnunmawia, MLA, Horticulture Development Board Vice Chairman chuan IBSD scientist te puihna hmanga mau hmanga eizawnna kawng thar inhawng thei tur a awm chu lawmawm a tih thu a sawi.

Dr. K.Pachhunga, MLA, Bamboo Development Board Vice Chairman chuan mau-a biosilica awm, damdawi leh thil dang atana hlutna nei tha em em leh hralhna awm nghal mai bawk si, tun hmaa kan la hriat ngai loh Mizo ten kan han hmelhriat hi a lawmawm a tih thu a sawi a. Mau hman tangkai theih dan kawng hrang hrang te sawiin, mau zirchianna kawngah hmalakna tur tam tak kan la nei a ni tiin a sawi.

Dr. Kumaraswamy Jayaram, Scientist, IBSD chuan mau atanga biosilia lakchhuah dan zirtirna hun a hmang a. Zawhna leh chhanna te mai bakah kalkhawmten sawihona hun tha tak an hmang chhunzawm bawk a ni.

Programme hi Dr. C. Vanlalramsanga, Commissioner & Secretary, Planning & Program Implementation Department (Science & Technology) chuan a kaihruai a. Prof. Pulok K Mukherjee, IBSD Director chuan video conferencing kaltlangin Imphal atangin thusawina hun a hmang a. Dr. R.K.Lallianthanga, Chief Scientific Officer, Directorate of Science & Technology chuan kalkhawmte chunga lawmthu sawina hun a nei bawk.

He hunah hian sorkar leh IBSD lam mithiamte bakah mau hmanga eizawngtu chi hrang hrang te an tel a ni.