No.3643/2021-2022
Aizawl, the, 13th January, 2021: Nimin khan Khawzawl District Bawrhsap Pu C.C. Lalchhuangkima, Chairman, District Disaster Management Authority (DDMA) kaihhruaiin DC Conference Hall-ah Covid-19 hrileng laka himna tura inkaihhruaina SOP hman mek ngaihtuahin DDMA Extended Meeting neih a ni.

DDMA Extended Meeting chuan Khawzawl District chhung khaw hrang hrangah Covid-19 hrikai hmuh chhuah an pun tak zel avangin SOP hman mek chu khauh zawka her rem an rel a. SOP siam rem ang chuan Dawr, Bazar leh Hawker Stall-te chu zing dar 10:00 atanga tlai dar 4:00 thleng an inhawng thei dawn a, dawr nghaktu leh thil leituten mask an vuah ngei ngei tur a ni. Lumehna dawr chu January thla chhung khar tur niin, Sport practice (Tournament telin) pawh January thla chhung khap a ni. Biak In a inkhawm (chhun leh zan) January thla chhung phal loh a ni bawk a. Pathian ram lakkhawm, Baptisma programme leh Kohhran Committee pawimawhte chu inkaihhruaina tha taka zawm chunga neih phal a ni a. Inneih inkhawm leh mitthi vuinaah mi 30 chin awm phal a ni a, Class X & XII Board exam turte chauh School kal phalsak an ni. Hotel leh Restaurant hawn phal ni mahse, a chhunga thil ei phal a ni lo a, pack a hralh chhuah tur a ni. Zing exercise lak chu dar 7:00 thleng mimal tan phal a ni a; a huhoa phal loh a ni a, tlai lamah excercise la a chhuah phal loh a ni.

DDMA Extended Meeting chuan Superintendent of Police (SP), Khawzawl District chu Khawzawl Town chhung hmun lunlaiah mask vuah lo leh SOP dang zawm thalote endik kawnga Check Post ruahman turin a ruat bawk.

He hunah hian DDMA Member-te bakah Kohhran hruaitute leh VLTF Chairman-te an tel a ni.