No.3644/2021-2022
Aizawl, the 13th January 2022 : Sports & Youth Services Department bultumin nimin khan a vawikhatna atana Mizoram ah National Youth Day hman a ni a. Nizana National Youth Day puala programme Vanapa Hall ah neihah, Mizoram Legislative Assembly Speaker Pu Lalrinliana Sailo chu khuallian niin Sports & Youth Services enkawltu Minister Pu Robert Romawia Royte chu khual zahawm a ni a. Pu K. Laldawngliana, Vice Chairman Commerce & Industries Development Board leh Pu T.C. Pachhunga, Vice Chairman, Sports, Tourism & ICT Development Board te pawh an tel a ni. Hripui len thar leh avangin mi tlemte chauh sawmin virtual mode in programme hi hman a ni a, Live in cable TV lamah leh social media platform ah te pawh pekchhuah a ni bawk.

Pu Lalrinliana Sailo chuan nu leh pa te thuawihna leh zahna nei chunga Pathian tihna nen thalai ten an hmalam hun an pan chuan eng pawh tiin buaipui sela hlawhtlinna leh hmingthatna an hmuh theih tur thu sawiin mi hlawhltling tia kan sawi fo tam tak hi nu leh pate zahthiam leh an thu awih thin an ni zel a ni, a ti a. Mizorama thalai in an mamawh ber chu i pianna ramin a mamawh che tih hi hriat thar a ni tiin ka ram tan enge kan tih thei tih hi thalai ten an ngaituaha, hemi vawng chunga an theihna zawng zawngin hma lam an pan a tul tiin a sawi a. Speaker chuan Mizo thalai te chu mahni inrintawk a leh mahnia intodelh tura fuihin hma lam hunah enge kan tawng dawn tih a hriat lova mahse hmalam hun hi a eng zawnga kan thlir thiam a ngaiin a tul a, chutiang tur chuan in nun inbuatsaih turin ka duh che u ni, a ti.

Pu Robert Romawia Royte chuan Sawrkarin thalai a ngaipawimawh hle tiin an hmakhua ngaiin Sports Policy te duan a ni a, Sawrkarin sports hi industry ah a puang a, hemi avangin hmasawnna tam tak kan hmu mekin rah tha a chhuak mek zel a. A bik takin hei hian eizawnna kawng thar a siam mek a, a entirna pakhat chu tunhnaia Futsal khelh kan neih belh te leh hengte hi inkhelh nan an inchan lo hial te hi a niin ka hria, a ti a. Kokim zawka thalai te hmasawnna tur ngaihtuaha an kal zelna tur policy kimchang tak Youth Policy chu Sawrkarin kumkhat chungin a duang dawn tih a puang a ni. Hmasawn tur chuan ngaihtuahna leh rilru hi a pawimawh hle a, thalai te hian thenawm state leh hnamdang te kan thlen chinah kan intehkhin hi thil tul tak a niin ka hria tiin Mizo thalai te mahni inrintawkna nen hma lam hun pan turin a fuih a ni.

Programme kaihruaitu Pu H. Lalengmawia, Commissioner & Secretary, Sports & Youth Services chuan National Youth Day tobul leh a hman chhan te sawiin thalai te ram hmasawnna atan an pawimawh zia te tarlang a ni.

Mizo thalai tunhnaia khawvel huap inelna a lang pha 2 te – Lalremsiami, Hockey a India aiawha Olympics ah tel leh Jeremy Lalrinnunga, Youth Olympics a Gold Medal la ten Mizo thalaite hnenah thuchah tawi an sawi video clip chu programme ah chhuah a nih bakah Jump Rope hmuhnawm tak Lalrohlui leh Vanlalmawipuia ten an entir bawk a ni.