No.206/2021-2022

Lunglei the 20^th April, 2021 - Covid-19 hrileng laka him tlanna tura Mizoram sawrkarin inkhuahkhirhna thupek (dated 19.04.2021) a siam bawhzuiin vawiin chawhnu khan Lunglei DC Pu Kulothungan A kaihhruaiin a office chamber-ah meeting neih a ni.

Bawrhsap leh District Level Task Force on Covid-19 Chairman ni bawk Pu Kulothungan A chuan Covid-19 hrilengin kiam lam pan lova zual lam a pan zel avangin kan himna tura sawrkarin dan zawm tur a duante zawm hram hram turin Lunglei District mipuite a ngen a. Inkhuahkhirna kalpui a nih rualin mipuite tana harsatna siamlo zawnga VLTF ten ruahmanna an siam a tul thu a sawi bawk.

19th April, 2021-a Mizoram sawrkar DM&R Department in inkhuahkhirhna thupek a tihchhuah chu Lunglei District-a tha taka kenkawh anih theihnan Meeting-ah hian ruahmanna siam ho a ni a. Covid-19 Executive Duty chhunzawm leh ni se tih lo rel tawh angin khawpui chhung hmun hrang hrangah sawrkar hnathawkte tun kar atangin an duty leh dawn a. Police lam pawh ngawrh taka duty kalpui mekin shift hnih (2) – chhun leh zan ah duty kalpuiin Lunglei khawpui chhung lun lai hmun nga (5) ah an duty a. Hemi bakah hian patrolling an kalpui reng bawk a ni.

Inkhuahkhirhna thupek hi Lunglei District-ah tha taka kalpui anih theihnan Executive Magistrate/Incident Commander te ruat niin heng Magistrate-te hian an bial chhunga VLTF-te ruahmanna an siampui dawn a ni.

Lunglei District-ah tun dinhmunah Dedicated COVID Health Centers (DCHC) pakhat - Urban Primary Health Centre (UPHC), Sazaikawn neih mek niin  Covid Care Centre (CCC) pahnih - Zobawk PHC leh SIRD Pukpui te a awm a. BSF sipai lo haw tur te positive an lo awm chuan an tan Sazaikawn Multipurpose Hall chu CCC-a hman tura ruat a ni a. Tlabung, Lungsen leh Bunghmun-ah te pawh a tul anga inkhunghranna tur Quarantine Facility-te ruat ni se tih niin Executive Magistrate-te mawhphurna pek an ni.