No.205/2021-2022

Kolasib dated 20th April 2021: Vawiin chawhnu khan DC Conference Hall, Kolasibah Covid-19 thawh hnihna dolet nana Mizoram sawrkarin 'Inkhuahkhirna Thupek' a tihchhuah en hona hun hman a ni a. Executive Zonal Magistrate, District Hospital, Kolasiba hotute, Kolasib town leh Kawnpui VLTF aiawhte leh Sub- Headquarters YMA, Kolasib hruaitute an tel a ni.

Dr.H.Lalthlangliana, Deputy Commissioner, Kolasib chuan inkhuahkhirna kalpui a nih rualin mipuite chiai lo tura siam a pawimawh thu sawiin thupek hlenchhuahna kawngah duty-te chuan zahawm leh hawihawm takin mipuite dawr țhin turin kalkhawmte a chah a. Inkhuahkhirna sawt zawka kalpui tur chuan VLTF-te leh Sawrkara mawhphurna neite thawh hona a țul hle tur thu sawiin mikhual lut chhuak chhinchhiahna kawngah leh Covid-19 hri kai hnuchhuina kawnga Medical team-te leh VLTF-te chu inrawntawn chunga thawhhona kalpui a țul thu a sawi bawk a ni.

Dr.Lalhlimpuia, Chief Medical Officer pawhin Covid-19 laka kan him nana zawm tur pawimawh hrang hrang sawina hun hmangin Vaccine lak kawngah inzirtirna uar zawka neih a tul thu a sawi a, a hun takah la tur takten Vaccine an lak hi hrileng dona kawng pawimawh tak pakhat a nih thu a sawi bawk a ni.

Mizoram sawrkarin inkhuahkhirna thupek a tihchhuahte chu chiapchiar taka en ho niin Kolasib district chhunga sawt zawka kalpui dan tur sawiho a ni a. Covid-19 kai inringhlelten District Hospital an pan huna hriat tur tulte Dr. Doris Lalnunmawii Sailo, DMS hnen atangin ngaihthlak a ni bawk a ni.

Covid-19 kai inringhlelte chuan an awmna veng VLTF hnenah inhriattirin VLTF-te kaltlangin District Hospital hriattir an ni ang a. District Hospital Casualty phone number-ah emaw Mobile number 8414095165-ah te inhriattir tur a ni. Casualty-a lut tlang mai lovin, Casualty building chungah innghahna room,’Holding Room’ ah endik an nih hma chu lo nghah tur a ni ang. Eye building-ah endikna hi neih tur a ni ang a, an lo vei palh a nih chuan a natna lanchhuah dan a zirin inenkawlna tur hmuna hruai leh tur an ni ang.